„Следната недела како донација треба да пристигнат и 500.000 маски и 20.000 тестови, реагенси за тестирање на корона вирусот. Добивме одговор од повеќе донатори, преку норвешката Влада за респираторни машини, кои ги очекуваме на почетокот на април, а следниве денови ќе добиеме дефинитивен одговор и од кинеската амбасада, од која побаравме донација пред неколку недели“, истакна министерот за здравство Венко Филипче на денешната прес конференција.
*
Развојна банка, Управата за јавни приходи и Централниот регистар на Република Северна Македонија апелираат до фирмите коишто ја прибираат документацијата потребна за аплицирање на првата линија бескаматните кредити како една од мерките за КОВИД-19, тоа да го прават исклучиво по електронски пат. Во оваа прва фаза, директно ќе се кредитираат најпогодените сектори – угостителство, туризам и товарниот транспорт. Целта на овие кредити е да им помогне на најпогодените сектори да ги премостат иницијалните ликвидносни потреби во овој период. Кредитите се со каматна стапка од 0%, рокот на отплата е до 24 месеци и грејс период од 6 месеци.
*
Засега прогнозите на надлежните остануваат дека пикот на вирусот ќе биде кон крајот на април и оти бројката на заболени ќе достигне до околу 2.000 лица. Сепак, министерот за здравство Венко Филипче најавува детална анализа за очекувањата и за временскиот интервал кога што би можело да се очекува. Анализата, како што посочи Филипче, би била готова во текот на викендов или на почетокот на следната недела.
*
Кратењето на платите на администрацијата не е добра вест, но тоа реалноста. Јас како претседател на СДСМ не се откажувам. И ние во партијата имаме различни мислења и тоа е легитимно. Но, дефинитивно, ако политичките партии сакаат да бидат одговорни партии, како што се фалиме со добрите вести, така и неблагопријатните вести треба да им ги соопштуваат на граѓаните, порача претседателот на СДСМ Зоран Заев, на денешното гостување на Националниот телевизиски сервис.
*
Од денеска Република Северна Македонија е една од земјите во кои ќе се спроведуваат два значајни меѓународни проекти за борба против корона вирусот. Имено, денеска Светската Здравствена Организација го потврди учеството на нашата земја во програмата „Солидарност“, што претставува голема, меѓународна студија дизајнирана да даде податоци за најефикасен третман во лекувањето на пациентите со КОВИД-19.
*
Влада на РСМ на денешната 29 седница донесе одлуки за донаторската помош за справување со корона вирусот, лекот „хлорокин“ ставен на листата за укинување на царинската давачка, на дел од земјоделците се изземени од ограничувањето за движење за викенд деновите…
*
Претседателот на Владата на Република Северна Македонија денеска ја прими амбасадорката на Соединетите Американски Држави во нашата земја Кејт Мери Брнз, која на средбата ги пренесе честитките на нејзината земја за позитивната одлука на Брисел за почеток на преговорите за членство во ЕУ и за скорешно добивање полноправно членство во НАТО.
*
Министерот за надворешни работи Никола Димитров денеска имаше телефонски разговор со италијанскиот МНР Луиџи Ди Мајо, на барање на италијанска страна. Ди Мајо му честиташе на Димитров за позитивната одлука на Советот за општи работи на ЕУ за отпочнување на пристапни преговори со Северна Македонија, истакнувајќи дека и покрај тешките моменти во кои се наоѓа неговата земја, сака да им честита на македонските граѓани за овој долгоочекуван успех.
*
Здружението за промоција и развој на инклузивно општество „Инклузива“ од Куманово, апелира да се применуваат препораките од специјалниот известувач на ОН за правата со лицата со попреченост, Каталина Девандас Агилар за заштита од Ковид -19.
Б. Јордановска
