ВЕСТ НА ДЕНОТ
Реакции на дел од членовите на ДИК: Неприфатливи се нападите, притисоците и мешањето на одредени политички партии и на поединци од техничката Влада во изборните процедури
„Со особена загриженост за настаните кои во јавноста се продуцирани од изјави на политички партии и носители на високи владини функции, кои се однесуваат на работата на ДИК во врска со постапувањето по приговорите за парламентарните избори, Ве известуваме дека покрај тоа што сме лично понижувани и навредувани, исто така како членови во највисоката институција за организирање и спроведување на изборите, сме изложени и на неосновани и непримерени јавни политички притисоци и на закани за кривична одговорност поради донесените одлуки на ДИК“, се вели вореакцијата на претседателот на ДИК, Александар Даштевски и на членовите на ДИК, Радица Ристеска, Оливер Ристовски, Борис Кондарко, Бобан Стојаноски и Абдуш Демири.
ДИК ја известиле и амбасадорката на набљудувачката мисија на ОБСЕ-ОДИХР, Џилијан Стрик.
ИЗЈАВА НА ДЕНОТ
Во принцип во политиката секоја промена е добра бидејќи треба да донесе нешто ново. Тоа е една работа, а другата, колку што пратев, е оваа новата власт има многу големо мнозинство во собрание. Тоа е добар основ да се забрза европскиот пат и ќе биде полесно ако се продолжи европската политика, вели Милан Јазбец, поранешен словенечки амбасадор во Македонија во интервју за Цивил и Слободен печат.
Тој вели дека како поранешен амбасадор во Скопје имал можност да се среќава и со актуелната претседателка на државата и со идниот премиер и дека се познаваат добро.
ФЛЕШ ВЕСТИ
ПРАВДА Судската власт е самостојна и независна. Секое мешање во судството и во судската власт носи со себе сериозна опасност по демократијата, правната сигурност и владеењето на правото, велат од Судскиот совет на најавите на лидерот на ВМРО-ДПМНЕ и иден мандатар Христијан Мицкоски дека нивна цел е да го распуштат Судскиот совет и самите судии и обвинители преку тајно гласање да ги избираат своите преставници во Советот.
ИНТЕГРАЦИИ Германското Министерство за надворешни работи на платформата „X“ нагласи дека сакаат да ја видат Северна Македонија во ЕУ и оти e важно земјата во моментов да продолжи со уставните измени.
ПРЕСПАНСКИ ДОГОВОР Патот до Европа ќе остане затворен, а меморандумите нема да се ратификуваат во Парламентот, доколку од другата страна нема целосно почитување на Договорот од Преспа, порача денеска грчкиот премиер Кирјакос Мицотакис, јави дописничката на МИА од Атина.
ЕСТИМА Увид на сите предизвици за кинеско-македонските односи кои може да се појават во иднина, тешките политички одлуки кои можеби ќе треба да се донесат или на насоки во кои би можела да оди кинеската одмазда доколку се разгледа одреден момент го загрозува усогласувањето на Северна Македонија со „Западот“ и нејзините суштински интереси, пишува во анализата на Естима.
ВОЈНА ВО УКРАИНА
Овогодинешниот Избор за песна на Евровизија во Малме повторно предизвика бура од реакции и говор на омраза насочена кон припадниците на ЛГБТ заедницата и нивните права, во што предничи Русија, следена од нејзините медиумски сателити.
*
Главното ракетно и артилериско складиште на рускиот воен аеродром Белбек во близина на окупираниот Севастопол било оштетено вечерта на 15 мај, соопшти партизанската група Атеш од привремено окупираниот Крим.
СЛОБОДНА ЗОНА
Првата дама на Република Северна Македонија и првиот човек епилог од штотуку завршените парламентарни, уште и не седнати во кабинетите и таман нешто со Преспанскиот и по нешто со Добрососедскиот прикрпивме, успеаја, онака „државнички просперитетно“ пак да нè испокараат со соседите и од југ и од исток и не само со нив туку и со сите во ЕУ и скоро ќе се случи тоа и со западниот кој ни крив ни должен грешно закачен за нас го блокираме за ЕУ и, нормално, и со унгарскион со кого, не само поради милијардата туку таму има уште по некои во моментов не толку важни пикантерии но, најважното од сè e што нашата ни мила Татковина, онака постизборно, не губејќи ниту ден забрзано и гордо тргнува во рикверц и како што и навестија и како што новите властодршци веќе и почнаа да практикуваат некои нови третмани со соседите… пишува Зоран Иванов во колумната „И овојпат, како и повеќепати досега, загубено неповратно ќе е и ова време македонско“.
