ВЕСТ НА ДЕНОТ
Мицкоски му се извинил на Курти за инцидентот на скопскиот аеродром со косовската претседателка Османи
На заедничката прес конференција помеѓу премиерите на Република Северна Македонија и Република Косово, Христијан Мицкоски и Албин Курти, на новинарско прашање, дали Мицкоски се извинил за инцидентот на скопскиот аеродром на втори јули, со косовската претседателка Вјоса Османи, Курти одговори дека додека траела тет-а тет средбата со Мицкоски, имало извинување од негова страна, односно, дека изразил жалење за инцидентот и на средбата, како и претходно.
За време на прес конференцијата за медиуми, Мицкоски изрази жалење за тоа што се случило, нагласувајќи дека, доколку дознал на време, ќе одел на аеродромот лично, и би ја дружел претседателката, како и дека ќе се погрижи никогаш повеќе да не се случат слични инциденти, бидејќи двете земји имаат одлични соседски односи во сите сфери, и дека и во иднина ќе продолжи да се гради добриот однос.
ИЗЈАВА НА ДЕНОТ
Шефовите на дипломатиите на членките на Групата седум индустриски развиени земји (Г7) и високиот претставник на ЕУ за надворешна политика и безбедност, Жосеп Борел ги повикаа сите инволвирани страни на Блискиот Исток да се воздржат од продолжување на тековниот деструктивен циклус на одмазднички насилство, да ги намалат тензиите и конструктивно да се ангажираат кон деескалација на состојбата.
РЕГИОН
Бугарската партија „Има Такoв Народ“ (ИТН) денеска на бугарскиот претседател Румен Радев му го врати мандатот за формирање влада по неуспешниот обид за формирање стабилна владејачка коалиција, со што Бугарија се приближи до седмите избори во последните три години.
СВЕТ
Украинскиот претседател Володимир Зеленски на социјалните мрежи сподели фотографии од пристигнатите авиони Ф-16 во Украина.
„Го овозможивме она што беше наша амбиција, наша потреба за одбрана, а сега Ф-16 е навистина реалност, реалност на нашето небо“, пишува во објава Зеленски.
– Украина ги доби своите први борбени авиони Ф-16 од американско производство, изјави вчера претседателот Володимир Зеленски. „Ф-16 во Украина. Ние го направивме тоа“, рече тој на церемонијата во неименувана воздушна база.
СЛОБОДНА ЗОНА
„Несомнено, Хитлер бил посебно иритиран и не се воздржувал постојано и јавно да го прозива и да му се заканува на весникот, а секако и да го тужи уредникот на „Минхенски пост“, Мартин Грубер. Очекувано, судот пресудува во корист на Хитлер. Освен што Хитлер и неговата пропаганда водат континуирана кампања да го дискредитираат весникот во јавноста и го малтретираат уредникот со тужби, партиските милитанти на НСДАП (нацистичката партија) не ја штедат редакцијата ни од насилни физички напади.
Во ноќните часови, во деновите на обидот за пуч во 2017 година – пардон, во 1923 година – нацистите ја вандализираат редакцијата, ја уништуваат архивата и крадат сѐ што е потребно за нормално одвивање на работата на весникот. Нападите продолжуваат и понатаму, како што и весникот продолжува да се бори против нацистичката наезда до последниот миг.
И да не раскажувам понатаму, мислам дека сѐ е јасно. Само препорачувам – овој документарец може да се гледа и постпразнично, бидејќи борбата, нели, не продолжува, туку – трае, пишува Џабир Дерала во колумната „Празнични белешки и пропуштени лекции: Медиумите под опсада, од Хитлер до денес“.
*
„Македонската опозиција не покажа никаков интерес да го прокоментира и целосно поддржи минатонеделното обраќање на министерот за европски прашања Орхан Муртезани, за брзи уставни измени, како единствена пречка, за продолжување на ЕУ интеграцијата, во кое и самиот министер потсети дека „во предизборната кампања како коалиција ВЛЕН, сме нагласиле дека тоа е еден од клучните приоритети, исто како што е и во програмата на Владата.”; како еден од ретките кои во изминатите месеци воопшто јавно ги изговори „забранетите зборови”: уставни измени.
Но, затоа пак не пропуштија да го таргетираат трет пат, претседателот на собранието Африм Гаши. Прво пречеше законската и уставна употреба на албанскиот јазик, како службен јазик; потоа пречеше „нарушената секуларност” на неформална седница во која едвај се „протна” одбележувањето на меѓународниот ден на сеќавањето и осудата на негацијата на геноцидот во Сребреница; за на крајот поголем скандал за “јавноста” во која солидарно се приклучи и СДСМ, да биде поведението на еден член на обезбедување (кој секако има механизми да биде санкциониран) на сметка на поведението и угледот на цела држава кон највисок странски дипломат. Чудна перспектива и приоритети, за до неодамнешните „предводници за ЕУ интеграциите”, пишива Никица Корубин во колумната „Ловци на уставните измени“.
Д. Муратов
