ВЕСТ НА ДЕНОТ
Премиерот Мицкоски почна со работа
„Ќе ги почитувам Уставот и законите на Република Северна Македонија“, рече Мицкоски. Со заклетва со уставното име, Мицкоски го започна четиригодишниот мандат.
Премиерското место го презеде од доскорешниот технички премиер Талат Џафери со кого си подадоа рака, но средбата продолжи зад затворени врати. Средбата со Џафери беше куса, зашто премиерот беше со набиена агенда. Мицкоски се упати кон Штип на камен-темелник за спортски центар, а веднаш потоа со коалицискиот партнер од „Вреди“ и министер за здравство Арбен Таравари го посети објектот во изградба на штипската болница. Мицкоски најави дека Владата ќе функционира како тим, а граѓаните ќе бидат горди.
ИЗЈАВА НА ДЕНОТ
Честитки за формирањето на новата влада. Додека премиерот и неговиот кабинет ја преземаат функцијата, со нетрпение очекуваме да го продолжиме нашето партнерство во зајакнувањето на владеењето на правото, подобрувањето на економијата, енергетиката и развојот на инфраструктурата, социјалните структури и придвижувањето на земјата напред на нејзиниот евроатлантски пат, стои во честитката на амбасадорката на Соединетите Американски Држави во земјава Анџела Агелер.
РЕГИОН
Шефот на хрватската дипломатија Гордан Грлиќ Радман денеска во Луксембург изјави дека Западен Балкан треба да се фокусира на решавање на отворените прашања и негување добрососедски односи во согласност со надворешната и безбедносната политика на ЕУ.
СВЕТ
Претседателот Володимир Зеленски му порача на шефот на украинската национална гарда да ги исчисти своите редови од оние кои ја дискредитираат откако двајца членови на гардата беа обвинети за заговор за атентат на нивни претпоставени.
СЛОБОДНА ЗОНА
„Огромната моќ што сега ја имаат Мицкоски и неговата партија не остава простор за оправданија за сѐ што претстои. Но дали е така? ВМРО има „несоборливи аргументи“ да ги оправдаат неуспесите што претстојат. Тие се безброј пати повторени. СДСМ и ДУИ оставија пустош, ја ограбија државата, ја уништија иднината. Затоа, мора сѐ да почне одново. Не можеме да продолжиме со ЕУ интеграциите со вакви институции. Европа ќе почека. Се разбира, и во составот на владата има една боксерска вреќа: Албанците од коалицијата ВЛЕН. Така што, нема потреба од загриженост. Сѐ е подготвено „нашата земја“ да јурне со полна пареа – назад, кон минатото“, пишува Џабир Дерала во колумната „Нека ни е со среќа: Можеби бројот 13 за некои е баксузен, но за Мицкоски сигурно е среќен број“.
*
„Мицкоски и неговата партија дојдоа на власт со големи ветувања. Уште пред да седне на премиерската фотелја истакнува дека „состојбата е лоша„. Но, токму затоа што не е добра му дадоа доверба. И во иднина граѓаните нема да го прифаќаат изговорот дека има последици од поранешната власт. Како што немаа толеранција кон апологијата на социјалдемократите дека „виновен за кризата е режимот на Груевски и узурпација на државните институции од страна на ВМРО-ДПМНЕ„.
Очекувања од новата влада се преголеми. Плуралистичката историја докажува дека ако не остваруваат ветувањата, разочарувањето може да биде исто така големо“, пишува Сефер Тахири во колумната „Влада на големите очекувања“.
Д. Муратов
Фото од Фејсбук профилот на Христијан Мицкоски
