ВЕСТ НА ДЕНОТ
Коалицијата „Твоја Македонија“ во Собранието поднесе предлог закон да нема покачување на струјата
Група пратеници од Коалицијата „Твоја Македонија“ предводена од ВМРО-ДПМНЕ денеска во Собранието поднесе Предлог закон за дополнување на Законот за енергетика по скратена постапка со којшто ќе нема зголемување на цената на електричната енергија за домаќинствата, информира на прес-конференција во Собранието мандатарот и лидер на ВМРО-ДПМНЕ Христијан Мицкоски.
ИЗЈАВА НА ДЕНОТ
Проф. Давитковски за ЦИВИЛ Медиа: Правото на локалната самоуправа е уставно загарантирано право на граѓаните
„Се поставува прашањето како се крши Уставот. Согласно член 114 во Уставот, правото на локална самоуправа е на граѓаните. Ако граѓаните се определиле за одредена личност, некој сега да каже после две години пу-пу не важи, јас ќе си одам министер, ама еве еден од мојата политичка провиненција или советник од Советот, тој ќе биде в.д. Каде се граѓаните? Тоа е нивно право“, професорот Борче Давитковски.
РЕГИОН / СВЕТ
ЕК по повод Светскиот ден на бегалците: ЕУ ќе остане место за заштита и безбедност на бегалците
Денес, на Светскиот ден на бегалците, кога рекордни повеќе од 120 милиони луѓе се присилно раселени ширум светот, ЕУ ја потврдува непоколебливата посветеност ЕУ да биде водечки глобален донатор за поддршка на бегалците ширум светот, се наведува во заедничката изјава на Европската комисија и високиот претставник на Унијата за надворешна политика и безбедност Жосеп Борел по повод 20 јуни – Светскиот ден на бегалците.
Хјуман рајтс воч: Кина менува стотици имиња на села за да ја избрише ујгурската култура
Кина ги променила имињата на стотици села во регионот Синџијанг со цел да ја избрише муслиманската ујгурска култура, соопшти организацијата за човекови права Хјуман рајтс воч (ХРВ).
Во извештајот на ХРВ се наведува дека имињата на стотици села поврзани со ујгурската религија, историја или култура биле променети меѓу 2009 и 2023 година. Во последните години кинеските власти радикално го реорганизираа општеството во Синџијанг во обид да го асимилираат малцинското ујгурско население во кинеската култура
СЛОБОДНА ЗОНА
„Зошто Србија учествуваше на Самитот за мир и гласаше ЗА? Се работи за стратешки чин на балансирање. Со гласањето „за“, Србија има цел да ја задржи својата деликатна позиција, божем неутрална, но која може да се опише како „седење на две столчиња“.“, пишува авторот Џабир Дерала во колумната „Зад фасадата на неутралноста: Разобличување на дипломатското лицемерие“.
Подготви: Д. Тахири
