Денес, целиот свет ќе застане за момент за да се сети на невините жртви на злосторството над злосторствата – геноцидот во Сребреница што се случи пред точно 30 години, пред целиот свет.
Во Меморијалниот центар на Сребреница – Поточари, денес ќе се одржи програма по повод 30-годишнината од геноцидот во „Безбедносната зона на ОН“ во Сребреница.
Исто така, ќе бидат погребани останките на 7 жртви од геноцидот извршен во 1995 година во Сребреница.
За време на геноцидот во Сребреница во јули 1995 година, силите на Армијата на Република Српска (ВРС) убија околу 8.000 мажи и момчиња во Сребреница и нејзината околина. Досега се идентификувани и погребани 6.671 лица.
Досега, 47 лица се осудени на повеќе од 700 години затвор за тие злосторства.
Радован Караџиќ, првиот претседател на босанскиот ентитет Република Српска (РС), беше осуден во Хаг на доживотен затвор за геноцидот во Сребреница, како и за злосторства против човештвото и кршење на законите и обичаите на војување во други делови на Босна и Херцеговина.
Врховниот командант на ВРС, Ратко Младиќ, исто така беше осуден на доживотен затвор за геноцид во истиот суд.
Осудени беа и Љубиша Беара, поранешен началник на обезбедувањето на Главниот штаб (ГШ) на Армијата на Република Српска (ВРС), Здравко Толимир, поранешен помошник командант за разузнавање и безбедносни работи на Генералштабот на ВРС, и Вујадин Поповиќ, началник на обезбедувањето на Дринскиот корпус на ВРС.
Злосторството во Сребреница од јули 1995 година е единственото што се случи на територијата на поранешна Југославија и кое беше окарактеризирано како геноцид пред меѓународните и домашните судови.
Владата на Федерацијата Босна и Херцеговина го прогласи 11 јули за Ден на жалост во овој ентитет, додека ден на жалост не беше прогласен во другиот ентитет, РС, односно во целата земја. Тој е ден на жалост и во округот Брчко.
Генералното собрание на Обединетите нации ја усвои Резолуцијата 78/282, со која 11 јули се прогласува за Меѓународен ден на размислување и одбележување на геноцидот во Сребреница од 1995 година. Оваа резолуција, иницирана од Германија и Руанда, има за цел да се сети на жртвите од масакрот во Сребреница, да го осуди негирањето на геноцидот и да ja промовира едукацијата за спречување на идните злосторства.
Д. Т.
