Проектот „Сите Сити“, е првиот систем за донирање на вишок храна во Македонија кој официјално започна да функционира од вчера, а носители на проектот се Граѓанската организација „Ајде Македонија“ со поддршка од Швајцарската амбасада, УСАИД, Мировниот Корпус, Националниот Демократски Институт и агенцијата за маркетинг комуникации „Publicis One“.
Според податоци на Државниот завод за статистика, 453 илјади луѓе во Македонија живеат во сиромаштија и не можат да си ги дозволат сите оброци на ден, со месечни приходи помалку од 6500 денари. Стапката на сиромашни лица, во 2016 година, во земјава изнесувала 21,9 отсто. Од друга страна, илјадници тони на безбедна храна се фрла секојдневно во депониите.
„Станува збор за проект кој има за цел вишокот храна, кој сè уште е во добра состојба и безбеден за употреба, да не заврши во депониите туку да се пренамени онаму каде е реално „Сите си ТИ“; каде покрај примарната цел храната да стигне до поединците и семејствата кои не можат да си дозволат повеќе обрoци во текот на денот, исто така се грижиме и сметаме дека е многу важно да ја подигнеме и свеста кај луѓето за важноста за правилно третирање на вишокот храна. За големината на општествената промена зборува фактот што само во подготвителниот период повеќе од 1 тон храна се донираше на повеќе од 3.300 граѓани“, изјави Блаже Јосифовски, Претседател на Асоцијацијата „Ајде Македонија“.
Главните извори од каде ќе се собира вишокот на храна и ќе се пренамени се производителите на храна, дистрибутерите, угостителските објекти, пекари и др.
Компаниите кои веќе се вклучија се: „Нелт СТ“, „Рудине“, „Виталиа“, „Јоми Фуд“, „Пекара Перек“ и други.
На настанот се потпиша и Меморандум за соработка меѓу 14 граѓански организации и 5 бизнис претставници кои заедно влегуваат во системот за
донирање на храна.
На крајот на конференцијата, за печат Јосифовски повика: „Ова е само почеток. Се радуваме на сите нови компании кои се бават со производство и дистрибуција на храна кои ќе покажат интерес и добра волја да ни се приклучуваат во овој голем подвиг наречен „Сите сити“. Ова е воедно и повик сите бизниси да се вклучат во спасувањето и донирање на храна за социјално загрозените граѓани“.
А. Петровска
