Повеќе од 500 лекари и над 150 студенти по медицина од Квебек, Канада го потпишаа јавното обраќање во знак на протест поради покачувањето на нивните плати!
„Ние, лекарите од Квебек, кои веруваат во силен јавен систем, се спротивставуваме на неодамнешните зголемувања на платите, преговарани од нашите медицински здруженија“, стои во писмото на лекарите.
Групата лекари вели дека се навредени од овие покачувања, додека медицинските сестри и пациентите се борат со проблеми.
„Овие зголемувања се уште пошокантни, бидејќи нашите медицински сестри, службеници и други професионалци се соочуваат со многу тешки услови за работа, додека нашите пациенти живеат со недостаток на пристап до потребните услуги, поради драстичните кратења на буџетот и централизацијата на моќта во Министерството за здравство во изминатите години“, се вели во писмото објавено на 25 февруари.
„Единственото нешто што, се чини, е имуно на буџетските намалувања, се нашите награди“, се вели во писмото.
Канада има систем за јавно здравство што обезбедува „универзално покривање на неопходните здравствени услуги, обезбедени врз основа на потреба, наместо на платежната моќ“, стои на веб-страницата на Владата.
213-те специјалисти за општа медицина, 184 специјалисти, 149 лекари-резиденти и 162 студенти по медицина, сакаат – наместо да ги добијат покачувањата на примањата – парите да се вратат назад во системот!
„Ние веруваме дека постои начин да се редистрибуираат ресурсите на здравствениот систем во Квебек за да се промовира здравјето на населението и да се задоволат потребите на пациентите без да се туркаат работниците до крај”, се вели во писмото.
„Ние, лекарите од Квебек, бараме да се откажат зголемувањата на платите на лекарите, бараме подобро распределување на ресурсите на системот за доброто на здравствените работници и да се обезбедат здравствени услуги, достојни за луѓето од Квебек”, пишуваат лекарите во обраќањето до јавноста.
Според извештајот на Канадскиот институт за здравствени информации објавен во септември 2017 година, лекар во Канада е платен 260,924 долари (339,000 канадски долари) годишно, за клинички услуги од Министерство за здравство годишно. Според истиот извештај, во просек, семејниот лекар е платен 211,717 долари (275.000 канадски долари) за клинички услуги, а хируршки специјалист е платен 354.915 американски долари (461.000 канадски долари).
Цената на медицинското училиште во Канада е субвенционирана од регионалните влади, според Здружението на факултетите за медицина на Канада. Трошокот варира во зависност од тоа дали студентот е канадски државјанин, постојан жител или странски студент. За канадски државјани или постојани жители, школарината за првата година од медицинското училиште се движи од 2.567 долари (3.334 канадски) до 20.064 долари (26.066 канадски долари), според веб-страницата на Асоцијацијата на факултетите за медицина на Канада.