Екс-премиерот на Северна Македонија, азилант во Унгарија, Никола Груевски, доби право на глас на локалните избори што се одржаа вчера. Но, тамошната власт која му подари азил, го изгуби главниот град.
Унгарската опозиција постигна голем успех во главниот град Будимпешта, нанесувајќи му го најголемиот пораз на Виктор Орбан и неговата партија во последните 9 години. Гергели Карашони, кандидат на обединетата опозиција ќе биде нов градоначалник на Будимпешта. Ова стана јасно откако беа пребројани 89 проценти од гласовите. Карашони освоил 50 отсто од гласовите, а досегашниот градоначалник, Иштван Тарлос од владејачката Фидес освои 45 проценти. Тарлос ја изгуби битката за трет мандат, а на чело на унгарската метропола беше од 2010 година. Тој лично, веќе му ја честитал победата на својот ривал, а поразот го призна и владата на Орбан. „Владата ја почитува одлуката на граѓаните на Будимпешта“, изјави портпарол на владата.
Победата на опозицијата во главниот град според тамошните аналитичари доаѓа благодарение на обединувањето на опозицискиот блок. Опозицијата освои мнозинство и во Генералното собрание на Будимпешта, со 17, наспроти 14 места колку што освои партијата Фидес на Орбан. Освен Будимпешта опозициските кандидати освоија градоначалнички места и во 14 од 23-те поголеми градови во земјата, што е солидно мнозинство на уште едно ниво на управа со локалната власт. Партијата на Орбан освои повеќе локална власт во руралните делови на Унгарија.
По овој удар врз партијата на Орбан, опозицијата се очекува заеднички да настапи и на следните парламентарни избори кои треба да се одржат во 2022 година.
А. Зеќири
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 25.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
Доколку некоја содржина е потпишана со ЦИВИЛ Тим за комуникации, тогаш преземањето е дозволено во целост.
