Утре, во 12 часот, пред Јавното oбвинителство во Скопје, ќе се одржи мирен протест, како одбележување на една година од смртта на малата Тамара Димовска од Велес.
Иако е помината цела година, Јавното обвинителство се уште се нема изјаснето по кривичните пријави против одговорните за нејзината смрт. Под мотото „Доста беше молк од Јавното обвинителство!“, целата на протестот е уште еднаш да се побара од Јавниот обвинител, итно да покрене обвинените против одговорните за смртта на малата пациентка.
Тамара не ги доби потребните документи за лекување во странство, а Фондот и Министерството за здравство ја одолговлекуваа процедурата за нејзина операција. Институциите не можеа да се договорат дали и каде ќе се лекува деветгодишната Тамара, која имаше тежок деформитет на рбетниот столб.
Смртта на Тамара, предизвика голем број реакции и беа организирани повеќе протести, со кои се бараше оставка и одговорност за виновниците за нејзината смрт.
Последниот протест беше во декември минатата година, кога опозицијата поднесе интерпелација за министерот за здравство, Никола Тодоров, за која една од причините, беше и смртта на малата Тамара. Додека расправата по повод интерпелацијата беше во тек и пратениците дебатираа за состојбата во која денес се наоѓа македонското здравство, граѓаните и граѓанските организации, меѓу кои и ЦИВИЛ-Центар за слобода, пред Собранието бараа оставка од Тодоров, што за жал, не влијаеше на одлуката на парламентарното мнозинство кое не ја изгласа поднесената интерпелација.
