Како што се приближува времето за предвремените парламентарни избори на 12 април, сè почесто ќе гледаме обвинувања едни кон други од главните „натпреварувачи“ во трката за победа. Денеска, како една од главните обвинувања на опозициската ВМРО-ДПМНЕ кон владејачката СДСМ беше идејата за преименувањето на две училишта во Чаир.
Претседателот на СДСМ, Зоран Заев, го оцени преименувањето на две училишта во општина Чаир како незаконски спроведена постапка, која Централниот регистер треба да ја коригира веднаш, бидејќи не постои одлука на Советот на општина Чаир. За промената инфомираше министерот за образование Арбер Адеми на својот Фејсбук профил.
Адеми на Фејсбук објави дека се променети имињата на две училишта во Чаир – „Никола Вапцаров“, кое сега се вика „Исмаил Ќемали“ и „Рајко Жинзифов“ кое сега е „Имри Елези“. Тој во постот напиша дека ги потпишал потребните акти со што конечно завршило прашањето за именувањата на училиштата во Чаир.
-Со записник на некој си училишен одбор надвор од законските прописи е спроведена одлуката и доставени се материјалите. Ги повикувам институциите да постапат по закон. Законодавецот предвидел како се менува назив на училиште и тоа го одлучуваат граѓаните преку своите претставници, рече Заев денеска на прес-конференција во седиштето на партијата, одговарајќи на новинарско прашање за преименувањето на училиштата.
Од опозициската ВМРО-ДПМНЕ денеска преку соопштение изјавија дека Владата на СДСМ, без одлука на општинскиот совет и без примена на бадентерово мнозинство сака да ги смени имињата на училиштата.
Ангела Петровска
