Веќе денеска ќе биде разрешена директорката на Клиниката за кожни болести најави министерот за здравство Венко Филипче на вонредна пресконференција. Директорката, која беше позитивна на тестирање за корона вирус по патување во Италија, поради непочитувањето на препораките на Министерството за здравство и Институтот за јавно здравје доведе во опасност најмалку 200 лица. Истовремено, поради контакт со неа, во изолација е целокупниот персонал на скопската клиника за кожни болести, како и персоналот од Одделението за кожни болести од штипската болница. Филипче соопшти дека Министерството за здравство прави список на дерматолози кај кои во оваа ситуација ќе може да се обратат пациентите.
Директорката може да биде разрешена од функцијата, иако е предизборен период, бидејќи ги прекршила етичките правила на однесување, утврдила Антикорупциската комисија.
– Денеска разговарав со претседателката на Државната комисија за спречување корупција, која ме извести дека кога има ваква итност, може тоа да се направи, и ние тоа веќе денес ќе го направиме. Истовремено ќе назначиме в.д. директор бидејќи, иако во клиниката нема работен процес, некој треба да ги извршува тековните административни работи, појасни Филипче.
Заразената директорка може да добие само јавна опомена од Лекарската комора, соопшти денеска професионалното здружение на лекарите, но не и одземање на лиценцата.
Оттаму велат дека во Законот за здравствена заштита не е предвидена мерка за загрозување на јавното здравје, туку дека тие мерки се предвидени во Кривичниот закон, па согласно тоа Комората може да постапи само по одлука на Судот.
Во исто време, Основното јавно обвинителство за медиумите изјави дека се уште е рано за кривично-правна интервенција за директорката која заразена со корона вирусот пет дена одела на работа, затоа што не се знае дали заразила некого или не.
Ова дело се однесува на членот 205 од Кривичниот законик – „Тој што со кршење на прописи или наредби со кои надлежен орган определува прегледи, дезинфекција, издвојување на болни или некои други мерки за сузбивање или спречување на заразни болести кај луѓето или со вработување или држење на лице кое боледува од заразна болест со вршење на полово дејствие или на друг начин, предизвика пренесување на заразна болест, ќе се казни со парична казна или со затвор до три години“.
Од обвинителството додаваат дека директорката не може да се гони по членот 206 каде е предвидено дека „тој што за време на епидемија на некоја опасна заразна болест не постапи според прописите или наредбите со кои се определуваат мерки за нејзиното сузбивање или спречување, ќе се казни со парична казна или со затвор до една година“, затоа што во земјата не е прогласена епидемија.
Покрај овие два члена од Кривичниот законик, однесувањето на директорката може да се опфати и со следните членови:
- ПРЕДИЗВИКУВАЊЕ ОПШТА ОПАСНОСТ, Член 288 – Тој што со пожар, поплава, експлозија, отров или отровен гас, јонизирачко зрачење, моторна сила, електрична или друга енергија или со друго општоопасно дејствие или средство ќе предизвика значителна опасност за животот или телото на луѓето или за имот од големи размери ќе се казни со затвор од шест месеци до пет години.
- ЗЛОУПОТРЕБА НА СЛУЖБЕНА ПОЛОЖБА И ОВЛАСТУВАЊЕ, Член 353 – Службено лице кое со искористување на својата службена положба или овластување, со пречекорување на границите на своето службено овластување или со неизвршување на својата службена должност ќе прибави за себе или за друг некаква корист или на друг ќе му нанесе штета, ќе се казни со затвор од шест месеци до три години.
- НЕСОВЕСНО РАБОТЕЊЕ ВО СЛУЖБАТА, Член 353-в – Службено лице или одговорно лице во јавно претпријатие или јавна установа кое со повреда на законските прописи за судир на интересите или за совесно постапување при вршењето на дискреционо овластување, со пропуштање на должен надзор или на друг начин очигледно несовесно постапува во вршењето на своите овластувања и должности и со тоа ќе прибави за себе или за друг некаква корист или на друг ќе му нанесе штета, ќе се казни со затвор од три месеци до три години.
- ИЗЛАГАЊЕ НА ОПАСНОСТ, Член 134 – Тој што друг ќе остави без помош во состојба на опасност за животот, која самиот ја предизвикал, ќе се казни со затвор од три месеци до три години. Ако лицето изложено на опасност поради тоа го загуби животот или е тешко телесно повредено или здравјето му е тешко нарушено, сторителот ќе се казни со затвор од една до пет години.
Кривичниот законик предвидува и дека ако поради делото од членот 205 некое лице е тешко телесно повредено или здравјето му е тешко нарушено, сторителот ќе се казни со затвор од една до десет години.
Исто така, во членот 38-б, е предвидено дека судот може на сторителот на кој му изрекол казна затвор или условна осуда со која е утврдена казна затвор да му забрани вршење на определена професија или дејност, на должности или работи сврзани со стекнување, располагање, користење, управување и ракување со имот или за чување на тој имот, ако ја злоупотребил својата професија, дејност или должност заради извршување на кривично дело и ако врз основа на природата на извршеното дело и околностите под кои е сторено може да се очекува дека таквата дејност ќе ја злоупотреби за повторно вршење кривично дело.
Во став 3 од овој член е предвидено дека кога на сторителот му е изречена казна затвор во траење од најмалку шест месеци се пропишува задолжително изрекување на забраната заедно со казната затвор.
