Претседателката на Европската комисија, Урсула фон дер Лајен, додаде опции за амандмани на нејзиниот предлог за следниот долгорочен буџет на Европската Унија, откако Европскиот парламент се закани дека ќе го блокира, според писмо во кое имала увид ДПА.
Фон дер Лајен писмено ги информирала претседателката на Европскиот парламент, Роберта Мецола, и актуелното претседателство со Советот на ЕУ за можни амандмани на нејзиниот предлог, дознава ДПА.
Опциите вклучуваат да им се даде поголем збор на регионите, да се понудат можни заштитни мерки за земјоделскиот сектор и да се зајакне улогата на Европскиот парламент во распределбата на парите од буџетот на ЕУ.
Доколку земјите-членки на ЕУ се согласат, дел од буџетските средства на ЕУ би можел да биде резервиран конкретно за развој на руралните региони, покрај наменското трошење според Заедничката земјоделска политика (CAP).
Според писмото, додатоците имаат за цел да го поддржат процесот на усвојување на финансиската рамка на ЕУ за 2028 – 2034 година. Долгорочниот буџет би дозволил трошење од околу 2 трилиони евра (2,3 трилиони долари), приближно 700 милијарди евра повеќе од сегашниот седумгодишен буџетски период.
Овој потег доаѓа откако лидерите на главните политички групи во Европскиот парламент ѝ порачаа на Фон дер Лајен во заедничко писмо дека делумно го отфрлаат првичниот предлог на Комисијата.
Во писмото испратено кон крајот на октомври, високите пратеници во ЕУ изразуваат жалење што предлогот на Комисијата, претставен во јули, не ја зел предвид позицијата на Парламентот за зачувување на улогата на регионалната политика и зборот на Парламентот во одлуките за трошење.
Писмото беше потпишано од лидерите на Конзервативците, Социјалдемократите, Либералите, Зелените и други високи законодавци кои работат на темата.
Потписниците го критикуваат фактот што наместо парите да се поделат на неколку посебни фондови, секоја земја-членка на ЕУ би изработила индивидуални планови за трошење во следниот буџетски период.
Ова би можело да доведе до тоа големи суми пари да бидат распределени нетранспарентно, предизвикувајќи нерамнотежи, се вели во писмото.
Буџетот на ЕУ, наречен повеќегодишна финансиска рамка, ги наведува политичките приоритети на блокот за наредните години и колку пари се доделуваат за различни области.
Буџетот се усвојува според посебна законодавна процедура: Земјите-членки на ЕУ мора да го одобрат едногласно, а Европскиот парламент мора да даде согласност. Ако парламентот не го постигне потребното мнозинство, предлогот пропаѓа.
За да спречи такво сценарио, Фон дер Лајен покани денеска на состанок високи претставници, вклучувајќи ги Мецола и данската премиерка Мете Фредериксен, која моментално претседава со Советот на ЕУ, пренесе МИА.
