На вториот ден од предизборната кампања за предвремените парламентарни избори што ќе се одржат на 15 јули, активностите на партиите продолжуваат и во вечерните часови. Носителите на листите вечерва посетија неколку градови во земјата, кадешто се обратија пред своите поддржувачи.
Христијан Мицкоски, ВМРО-ДПМНЕ, на денешното обраќање во Струга продолжи со реториката на обвинувања, осврнувајќи се на зголемувањето на бројката на заболени од Ковид-19, за коешто, според него, е виновно раководството на СДСМ.
Мицкоски пред стружани потенцираше дека во петтата Изборна Единица изборот е јасен, помеѓу Дурловски, за кој што изјави дека е човек кој е почитуван во целиот свет и за неговата бескрајна и докажана љубов кон Македонија, со Шекеринска од другата страна, за којашто рече дека човек од времето на транзицијата што до денеска донесе многу неправди, а пред се во Струга.
Зоран Заев , СДСМ, вечерва во Охрид на трибина порача дека сега кога имаме шанса и кога имаме пријатели и кога сме членка на НАТО и имаме одлука за почеток на преговорите, не ни треба враќање назад.
Заев се осврна на вложувањата на локалната и централната власт во Охрид во последните три години и направи споредба со владеењето на ВМРО-ДПМНЕ.
Тој потсети и на просечната плата од 22.300 денари која ја затекнале кога СДСМ дојде на власт и со сегашната која во март оваа година беше 27,500 денари која е зголемена за повеќе од 5.000 денари,
Заев посочи за паралелното покачување на пензиите, покачувањето на платите во образованието, културните работници и минималната плата.
– Покачени се платите на вработените во детските градинки, на културните работници, покачени се сите плати во државата на ниво на минилна плата и на ниво на просечна плата. 5.550 ја покачивме минималната плата, од 9.000 денари на 14.500 денари, потсети Заев.
Носителот на изборната листа во ИЕ1 од коалицијата „Можеме“, Никола Димитров, вечерва во дневникот на телевизија Сител, во контекст на предизборната кампања изјави дека македонската нација во моментов нема вистински избор.
Димитров се осврна на последниот извештај од ЕК, во којшто се вели дека имаме добар напредок и во владеењето на правото, споредувајќи ги извештаите со тие што државата ги добиваше пред и за време на владеењето на СДСМ.
Во тек е конвенцијата на коалицијата на Алијансата за Албанците – Алтернатива, во Тетово, кадешто пред граѓаните се претставуваат кандидатите за пратеници на претстојните предвремени парламентарни избори.
Д. Тахири
