Кандидатот за премиер од редовите на ДУИ, Насер Зибери денеска имаше неколку средби со жителите на Тетово. Тој испрати порака дека 15 јули, иако како секој изборен циклус е важен за земјата, има одредена специфичност.
Зибери рече дека од Тетово праќа порака за дијалог кон политичките противници
„Нивните аргументи со кои се спротиставуваат на оваа идеја да седнеме пред јавноста да ги аргументираме. Да седнеме пред јавноста и да ги убедиме граѓаните со своите сугестии, алтернативи и визии како сакаме да ја градиме оваа земја во иднина. Јас не сакам и нема да бидам премиер само на Албанците. Јас претендирам да бидам раководител на идната Владата која ќе придонесе оваа земја да ја направиме поперспективна, поевропска, земја во која секој ќе се чувствува комотен како во својата куќа“, истакна Зибери.
Предизборниот караван на Македонски концепт денеска ги посети градовите Велес и Штип од Изборната единица 3.
Во Велес, Петар Богојески истакна што е приоритетно за градот и што е потребно за граѓаните на Велес.
“Прво што ќе понудиме на граѓаните на Велес е слобода како форма на живот, за Велес и цела Македонија, а второ е спокој, односно извесна иднина за граѓаните. Денес никој нема извесна иднина и не знае што се случува, законите се менуваат секој ден, ни граѓаните и бизнисмени не знаат што се случува. Не се знае што ќе се случи со работните места, или што следи утре. Трето е солидарно поведение каде е проектот за обештетување на граѓаните. Сите граѓани кои се жртви на транзицијата, од сите влади и политичари во изминативе 30 години, да бидат обештетени од буџетот на државата со околу 300 милиони евра годишно или 1,5 милијарда евра за следните 5 години почнувајќи од 2021 година. Овој проект ќе донесе социјална правда и правичност, проект што мора да се реализирани за да имаме барем минимална правда за граѓаните наспроти оние мал број индивидуалци што го приватизираа и ограбија целиот општествен капитал во минатото, а голем број семејства настрадаа во тој процес. Овој проект е многу корисен и важен за целата држава а посебно за Велес како град со многу стечајци”, изјави Петар Богојески.
Гордана Силјановска Давкова од ВМРО-ДПМНЕ, денеска се сретна со младите од општина Кисела Вода, каде истакна дека младите се потенцијалот и силата врз која треба да се темели државата во иднина.
Силјановска Давкова им порача на младите дека нивната е најважната приказна, дека нивната приказна говори за обновување на образовната инфраструктура, изградба на нови училишта, обновени факултети, институти, библиотеки, задолжително изучување на македонскиот јазик на универзитетите и посебност на Институтот „Блаже Коневски” со задолжителни лектори професори по македонски јазик на секој факултет.
Во изборната програма на ВМРО-ДПМНЕ, посочи таа, се предвидени ваучери за младите за културни и спортски настани, компјутерска едукација и уште многу образовни надградби.
Како Движење Беса ќе се грижиме за културното наследство, ќе се грижиме и за зелените места, за сите граѓани на Тетово и за сите граѓани на Северна Македонија. Ќe се грижиме да имаме достоинствeн живот што го заслужуваат сите граѓани, изјави денеска лидерот на Движењето Беса, Билал Касами.
Како што соопшти Беса, Касами гарантира дека преку коалицијата „Можеме“ ќе ја направат Шар Планина привлечно туристичко место, а не само Попова Шапка којашто заостанува и во јавните и во приватните инвестиции.
А. П.
