Политичкото финансирање или финансирањето на политичките партии и нивните кампањи, секогаш е завиено со велот на мистеријата. Тоа не би требало да биде така. По закон, сите мораат да одговараат за парите кои ги добиваат на своите сметки, за тоа како ги трошат и зошто ги трошат. Сите се одговорни пред законот подеднакво, барем така пишува во уставот и законите. Да видиме како тоа изгледа во случајот со ВМРО – ДМПНЕ.
Во 2014 и 2015 година, ВМРО – ДПМНЕ купуваат 63 канцелариски простори низ целата земја. Се проценува дека тие вредат околу 11 милиони евра, а се простираат на површина од 12.000 квадратни метри. Се разбира, ова ја исклучува онаа грдосија од седиште во центарот на Скопје што се простира на околу 11.000 квадратни метри, која е подарок од градежната компанија „Бетон“ која никогаш не откри колку вреди изградбата на оваа палата или „Белата палата“, некои ја викаат и „Шампита“. Но, оние што ги познаваат условите во градежништвото, проценуваат дека вреди околу 16 милиони евра.
Како и да е, политичките партии мора да одговорат на прашањата на јавноста. Во нашиот случај со оваа наша омилена партија, имаме ситуација во која партијата не одговорила на најмалку 40 прашања поставени јавно, преку колумни, писма, директни е-мејлови, па и преку директни телефонски повици со љубезни прашања. Меѓутоа, само во неколку месеци, овие 40 прашања се одговорени во – нула вредност. Поточно имаме нула одговори.
Ние се надеваме дека во најскоро време и ќе ги добиеме тие одговори, одговорите на прашањата кои се и законски поставени.
Политичките партии, без исклучок, нека е тоа и најголема, нека е тоа и најмала партија, мора да одговорат на прашањата поврзани со финансиите, бидејќи тие им припаѓаат на граѓанките и граѓаните кои овие политички партии тврдат дека ги застапуваат. Заради тоа, потребна е транспарентноста, не само како морална обврска, туку и како законска.
Џабир Дерала
камера: Ариан Мехмети
