Обвинителството за борба против организиран криминал и корупција заедно со Одделот за организиран криминал во МВР влегле утринава во неколку фирми кои основале портали преку кои, според сомневањата, раководството на ВМРО-ДПМНЕ злоупотребило пари на граѓаните во кампањата за предвремените парламентарни избори на 15 јули, пренесува сдк.мк.
Сомневањата, како што дознаваат од сдк.мк, се дека е прекршен членот 76-д од Изборниот законик кој пропишува дека сумата која може да се исплати на еден електронски медиум и печатени медиуми, од страна на еден учесник во изборниот процес, во случајов ВМРО-ДПМНЕ, не може да биде повисока од 15 илјади евра без пресметан ДДВ.
Обвинителството се сомнева дека партијата направила злоупотреби на штета на Буџетот на РСМ, од каде што се финансираат кампањите, со тоа што платила политичко рекламирање на интернет портали кои постојат кратко време и се со мала посетеност. Порталите, според сомневањата, биле формирани наменски пред изборите, без импресум, адреса седиште и што е најважно, немале ценовник за рекламирање на партиите. СДК дознава дека шефицата на Обвинителството за организиран криминал Вилма Русковска ќе ги проверува и наводите за слични злоупотреби на други две парламентарни партии.
Мониторингот на ЦИВИЛ евидентираше и 46 случаи на скриено рекламирање и кампања, „маскирани“ како други содржини, и 19 случаи на платено политичко рекламирање вон законски утврдените правила, како транспаренти и банери „случајно“ поставени на јавни места за време на предвремените парламентарни избори.
Како што објави ЦИВИЛ Медиа, непосредно по завршување на предвремените парламентарни избори, проблематични се и извештаите за донациите на шесте политички партии и коалиции кои освоија пратенички места, веднаш се забележуваат извесни разлики во донираните суми, во пристапот на финансирање преку донациите, но и во начинот на кој тие се претставени пред државните ревизори.
Во анализата на Жарко Настоски „Политичко финансирање: Кој и колку донирал во партиите и како се прикажани финансиите?“, објавена на ЦИВИЛ Медиа на 28 јули 2020, се вели дека ако се водиме според виденото во изминатите изборни кампањи, може да се заклучи дека системот кој го контролира финансирањето на партиските кампањи не е совршен и дека тој и натаму нуди извесни можности за злоупотреби или во најмала рака изигрување на правилата околу трошоците кои партиите ги имаат во кампањата.