Месец и половина по конституирањето на Собранието и една недела од формирањето на пратеничките групи, Беса реши дека во иднина во парламентот ќе делува самостојно.
Во дописот на Беса, доставен до претседателот на Собранието Талат Џафери се потпишани четворицата пратеници Биљал Касами, Кастриот Реџепи, Фадиљ Зендели и Бастри Бајрами, во кој се наведува дека ќе делуваат независно. Кастриот Реџепи, кој ќе ги координира пратениците од оваа партија вели дека тоа не значи напуштање на коалицијата.
Лидерот на Беса, Билал Касами најави дека Владата предводена од СДСМ ќе добие уште поголема поддршка во парламентот, преку зголемување на мнозинството.
-За прв пат по долги години ќе имаме Влада која ќе го реализира својот четири годишен мандат, имаме многу работа и многу проекти кои се во интерес на граѓаните, порача Касами.
Тој не откри конкретно кои пратеници ја најавиле поддршката на новата Влада, но рече дека со други пратеници во иднина ќе се зголеми парламентарното мнозинство во Собранието.
Откако во јавноста синоќа се пласираа информации дека движењето Беса ја напушта коалицијата со СДСМ, лидерот Касами во синоќешното издание на „Click Plus“ на ТВ21 рече дека тие никогаш не бил дел од СДСМ.
„Беса никогаш не била дел од СДСМ, туку ние сме дел од коалицијата „Можеме“, рече Касами.
„Ова не е напуштање на коалицијата, туку да се организираме подобро и да работиме поефикасно како БЕСА во парламентот. Немаме никакви проблеми со коалицијата Можеме и оваа одлука да бидеме надвор од неа не значи дека нема да даваме поддршка на законите кои ќе ги иницира власта. Одвојувањето ни е важно да бидеме поблиску до гласачкото тело.“, вели Кастриот Реџепи.
БЕСА има четворица пратеници кои ги доби од заедничките листи со СДСМ. Костадин Костадинов, за ТВ21 рече дека ваквата одлука ја донесе заеднички.
За да се формира пратеничка група според Деловникот потребни се најмалку пет пратеници, со што БЕСА нема да не може и формално да поднесе барање за пратеничка група.
Во моментов, владината коалиција е поддржана од вкупно 62 пратеници.
Д. Тахири
