„Договорот што го потпишавме со Бугарија не беше само договор за решавање на проблемите, туку и градење на доверба и на добрососедски односи. Ние вложуваме во тие добрососедски односи и очекуваме тоа да го направи и Бугарија“, изјави министерката за одбрана Радмила Шекеринска Јанковска, прашана за коментар за можното бугарско противење на почетокот на македонските преговори за членство во Европската унија.
„Дефинитивно одлуките кои што ќе се носат до крајот на годината ќе влијаат позитивно или негативно на тие односи. И тоа нема да бидат само нашите билатерални односи, туку и севкупно, ќе влијаат на регионот. Очекуваме токму државите кои што ги отвараа вратите сега да ја покажат истата волја, истиот интерес и истата желба да помогнат регионот да тргне напред“, рече Шекеринска по денешната промоција на Националниот акциски план за имплементација на Резолуцијата 1325 на Обединетите Нации „Жени, мир и безбедност“.
Таа нагласи дека македонската страна го почитува тоа на што се обврзала кога ги потпишала договорите со Бугарија и со Грција, но и дека очекува и соседите да ги почитуваат своите обврски.
„Со колегата Каракачанов има теми околу кои не се согласуваме и најверојатно нема да се согласме, но има една тема за која сме избрани да ја сработиме – регионот во кој што живееме да биде стабилен и безбеден, и нашиот влог кон таа стабилност и безбедност мора да биде добрососедство, решавање на проблемите, и обично резултатите од таа работа се подобри ако разговараме со аргументи и со желба да се најде решение, а не со емоции и со обид да се наметне решение“, вели Шекеринска.
Министерката за одбрана потсети дека токму со Каракачанов потпиѓшале неколку договори за интензивирање на одбранбената соработка:
„Таа одбранбена соработка може да функционира и да дава резултати само ако ние, кои што носиме одлуки, ја храниме со добрососедство“.
Шекеринска смета дека во ситуацијата со Бугарија не треба да се биде оптимист, песимист или изненаден.
„Денеска ќе згрешиме ако зборуваме за оптимизам наспроти песимизам. Што ќе се случува во регионот зависи од луѓето и политичарите во нашиот регион. Државите имаат право на свои политики, и тие политики често пати можат да бидат една наспроти друга. Меѓутоа, ако сме се решиле да градиме добрососедство, треба да се трудиме да ги решаваме проблемите, а не да ги зголемуваме. И мислам дека во доменот на нашите одлуки прашањето на изненадување не треба да биде фактор. Ние треба, едноставно, тоа што ни е на масата, треба да го решиме. Истото се однесува за нас, но истото се однесува и за Бугарија“, смета Шекеринска./META
