Градоначалникот на Прилеп, Илија Јованоски заедно со Извршниот директор на Центар за граѓанска иницијатива, Гоце Тодороски, денес имаа прес конференција на која го означија почетокот на акцијата за доделување на помош на ученици од ранливи категории кои имаат проблем со следење на online наставата. Оваа акција ЦГИ – Прилеп ја организира во рамките на проектот „Акции против родово базирано насилство кај Роми и други маргинализирани групи фаза II“ кој е финансиран од Федерална канцеларија за надворешни работи на Сојузна Република Германија.
Имено, во двете средни училишта во Припеп, СОУ „Орде Чопела“ и СОУ„ Ѓорче Петров“, на ученици кои се од ранливите категории и кои имаат проблем со следење на online наставата им се доделија таблет-уреди, а се најавија и други акции за помош на ученици во време на пандемија.
Градоначалникот Илија Јованоски кажа дека Општина Прилеп и тој како градоначалник ги поздравуваат сите активности и проекти кои придонесуваат за подобрување на животот на граѓаните. Јованоски рече: „Центарот за граѓанска иницијатива како невладина организација работи 23 години и се залага за унапредување и заштита на човековите права“. Ја поздрави хуманитарната работа за доделување на таблети на ученици на кои им се потребни, а потсети и на неодмнештото доделување на амбулантното возило на Градската болница кое го организираше ЦГИ со помош и финансии на Германската Амбасада.
Извршниот директор Гоце Тодороски изрази голема благодарност до Општина Прилеп за континуираната соработка и поддршка, а посебно се заблагодари на донаторот Германска Амбасада во Скопје при Федерална канцеларија за надворешни работи на Сојузна Република Германија. Во својата изјава Тодороски кажа дека денес ќе се поделат 34 таблети, но истиот проект вклучува помош за 111 социјално загрозени семејства со приоритет на Ромите од Општина Прилеп, односно два пати донација на пакети со хигиенски неопходни средства кои за скоро ќе бидат поделени.
Покрај овие пакети во делот на справуавњето со COVID – 19 пандемијата, ЦГИ во соработка со Германска Амбасада додели амбулантно возило на прилепската болница, а во болницата во Кичево ќе се изгради монтажен објект со 5 простории, опремен со медицински инвентар со намена за дневна болница, а и во болницата во Шуто Оризари ќе се донира медицинска техника, односно апарати за дезинфекција, скафандери, заштитни ракавици, маски и визири, боци со кислород, пулсоксиметри и слично.
Тодороски потенцира дека покрај помошта во рамките на овој проект се дава и психосоцилајно и правно советување на жртви на родово базирано насилство и лица кои излежале казна затвор.
Во СОУ „Орде Чопела“ благодарност до Центарот за граѓанска иницијатива и Германска Амбасада во името на колективот и учениците испрати претставникот на стручната служба Емилија Николоска, а во СОУ „Ѓорче Петров“ в.д. дирктор Петра Лукароска.
