Советот за реформи во судството денеска треба да ја потврди методологијата за прочистување на правосудството. Овој поцес, како што најави министерот за правда Бојан Маричиќ на прес-конференцијата по повод 100 дена Влада, е примарен за враќањето на довербата на граѓаните во системот.
„Долги судски рочишта, безброј одложувања, неефикасни постапки. Токму затоа во првите 100 денови со Судскиот совет и Советот на јавни обвинители интензивно работевме на подготовка на методологија по која следната година ќе се филтрира судството и обвинителството. Ова според нас е најдобриот начин, како фелата сама да си ги прочисти своите редови“, истакна министерот за правда.
Сите оние судии или обвинители, како што рече Маричиќ, кои незаконски постапиле, направиле прекршувања во постапките, намерно ги одложувале или нестручно постапиле ќе бидат исфилтрирани од правосудниот систем. Посебен фокус, како што додаде, ќе биде ставен на случаите на висока корупција и организиран криминал.
Маричиќ на обраќање на Конференцијата за човекови права, правда и антикорупција „Следна Станица: Европа“, во организација на ЦИВИЛ, на 10 декември изјави дека многу меѓународни извештаи конкретно посочиле за одредени состојби во правосудството, за која е потребно да се види дали има намерно заташкување на предмети, намерно нивно застарување, неправедно постапување или недоволна заштита.
„Сепак има светло на крајот од тунелот. Не случајно Европската комисија има зборови токму за проактивната улога на судскиот совет. Ова се однесува особено во делот на примената на новите правила за именување и унапредување на судиите, како и за утврдување на дисциплинската одговорност и нивно евентуално разрешување.
Во периодот од 2019 и 2020 година се разрешени 8 судии, а согласно информациите од судскиот совет има постапки за уште 83. Ако сакаме да успееме и да станеме модерна европска држава, правда едноставно мора да има и тоа еднакво за сите и тоа бескомпромисно и со еднаков аршин. Само така може да се зголеми довербата на граѓаните во судството и обвинителството, преку разрешница на крупни судски случаи со „големите риби“, додаде Маричиќ.
