По „несреќно“ објавената фотографија на Фејсбук каде што, во новите простории на Министерството за политички систем, се прославува и роденденот на лидерот на ДУИ, Али Ахмети, со сите сопартијци, без никакво почитување на мерките, во јавноста, очекувано се појавија низа негативни реакции.
„Да го славиш заминувањето од зградата на Владата, главното место на владеење и креирање политики во земјава, во една зграда на фалц-гипс-барокот на Груевски, испаѓа како да славиш што си спаднал од коњ на магаре… За начинот на „прослава“ во време на панедемија воопшто и да не зборуваме – прославата, поводот и актерите зборуваат доволно“, напиша Петрит Сарачини на социјалните мрежи.
Што прослави вчера ДУИ?🤔#SledeTene#RodendenMalaZabava #AluminiumOverMaximum pic.twitter.com/PvX0nCGtPm
— Petrit Saracini (@amon_mra) January 5, 2021
Објавата на Сарачини го отсликува општото мнение во јавноста, каде со крајна осуда беше оценет ваквиот начин на неодговорност од високи партиски функционери, вклучувајќи го и „домаќинот“, министерот за политички систем Артан Губи и министерот за надворешни работи Бујар Османи, кој ја објави, па ја повлече фотографијата од Фејсбук.
„За жал, тоа предизвика погрешна интерпретација. Немаше ниту прослава, ниту партизација, ниту непочитување на протоколите. Имаше момент на промовирање на новиот објект во Министерството каде еден од вработените го изненади претседателот Ахемти со честитка за неговиот роденден и тоа се искористи тој миг за да се направи слика“, изјави денеска Османи на прес-конференција, одговарајќи на новинарско прашање, обидувајќи се да ја оправда целата ситуација.
„Настанот се организира на првиот работен ден во новата година и според протоколите. Сликата што ја објави Османи беше само еден момент – за заедничка фотографија, при мало изненадување што колега го приреди за господинот Ахмети, слично како и минатата година во Собранието, искористувајќи го неговото присуство. Протоколите првенствено ги почитуваме за нашето лично здравје и за нашите семејства, како и за граѓаните“, е изјавата на Груби за А1он.
Сепак, Министерството за внатрешни работи денеска добило пријава за овој случај по кој веќе постапува и за која бил известен и јавен обвинител.
„Министерството за внатрешни работи, согласно своите надлежности, постапува по пријава примена во текот на денешниот ден, во врска со која е известен Јавниот обвинител и по добиeните насоки од него, а во согласност со Одлуката за изменување и дополнување на Одлуката за превентивни препораки, времени мерки, наредени мерки, наменски протоколи, планови и алгоритми за постапување за заштита на здравјето на населението од заразна болест COVID 19 предизвикана од вирусот SARS COV 2, случаите и временскиот период на нивна примена („Службен весник на РСМ“, бр.298 од 16.12.2020), презема мерки и активности за целосно расчистување на случајот, по што ќе следуваат соодветни поднесоци“, изјави за МИА началникот на Одделение за информации од јавен карактер во МВР Сузана Прањиќ Талевска.
Б. Јордановска
