„Заврши времето кога во државата имаше еден судија, еден обвинител, еден адвокат, еден извршител, кога целата моќ беше на едно место, сега секоја институција постапува согласно своите надлежности и овластувања“, изјави Вицепремиерот задолжен за борба против корупцијата и криминалот, Љупчо Николовски, одговарајќи на пратеничко прашање од пратеникот Александар Велјановски од ВМРО-ДПМНЕ. Николовски посочи дека ВМРО-ДПМНЕ во отсуство на идеи, секојдневно лиферува лаги, невистини и конструкции.
„Затоа секој ден ги гледаме овие лаги со прашалници без храброст да се излезе и да се тврди нешто. Но, граѓаните тоа го гледаат и граѓаните на 15 јули испорачаа казна за тоа што постојано и денес и во претходниот период ги блокирате сите процеси во државата, заради тоа што нема понуда за ниту еден проблем, затоа што не нудите решение на граѓаните. Помина и времето кога институциите не смееја да помислат да им ги споменат имињата на некои функционери, министри или блиски на власта, а не да влегуваат и да бараат документи, како што тоа денес се случува во рамки на сите институции“, изјави Николовски.
На прашањето за случајот со родиликата од Дебар и разрешувањето на директорот на струшката болница Мухамед Асани, вицепремиерот Николовски изјави дека веднаш се преземени мерки, извршен е вонреден надзор, издадено решение за забрана за вршење на дејност и поднесена иницијатива за кривична одговорност во ОЈО Струга.
„Во случајот со Асани беа покренати соодветни постапки и пред опозицијата да го изнесе, која треба да се интересира за здравјето, животот и вредностите особено за граѓаните. Прв сум, којшто излезе за овој случај и кажа и побара ДЗСИ да ги спроведе сите контроли и веднаш експресно во рок од 24 беше издадено решение за забрана за вршење дејност во просториите каде што се одвивале нелегални дејствијата на ординацијата, беа покренати постапки од институциите за да се покренат и информираат ЈО и сите оние кои се надлежни да реагираат. Преку посебна Комисија формирана од министерот за здравство, се донесе решение за смена на директорот. Така се постапува во било кој случај каде што е констатирана одговорност, пропусти и се охрабруваат институциите согласно своите надлежности да ги расчистат сите постапки“, изјави Николовски.
Вицепремиерот Николовски му порача на пратеникот Велјановски, дека како членови на ВМРО-ДПМНЕ, тие се должни да дадат став за „Плацевите на Водно“ каде што ВМРО-ДПМНЕ е оштетена со 1,3 милиони евра.
„Знам дека нервозата е се поголема кога не успеавте да го спречите носењето на Законот за ЈО, кога не успеавте да спречите да се трансферираат предметите од СЈО кои деновиве имаат разрешници, но јас од вас очекував поголема загриженост како членови на ВМРО ДПМНЕ да дадете став за тоа како и што се случува со „Плацевите на Водно“ каде што ВМРО-ДПМНЕ е оштетена со 1,3 милиони евра или како тоа од партиската каса вашиот лидер си купувал станови итн. Мислам дека тоа повеќе треба да ве загрижува и да излезете со став по однос на тие прашања“, рече Николовски.
