Во своето обраќање пред пратениците на денешната седница на која на дневен ред беше неговата интерпелација, министерот Спасовски потсети дека како резултат на интензивираните активности и координираното водење на криминалистичките истражувања во борбата со недозволената трговија со дрога, во периодот од 1 јануари до 15 април 2021 година се остварени значајни резултати, при што беше сузбиена шестчлена криминална група, а беа спречени пет меѓународни транспорти на дрога, во чии рамки се запленети над 688 килограми марихуана. Во овој период, истакна Спасовски, се запленети околу 850 килограми наркотична дрога, при што значајно е зголемена заплената на марихуана, хашиш, амфетамин и синтетички таблети.
„На граничниот премин Богородица, при извршен претрес во товарно возило помеѓу легалната стока-отпадна хартија, пронајдени и одземени се 390 килограми марихуана, набавена од Косово, која требало да се транспортира до Турција. На патниот правец Росоман-Прилеп, во близина на с.Манастирец-Кавадарци, во патничко возило управувано од лице од струшко пронајдени се 180 килограми марихуана. Во близина на с.Селемли-Гевгелија запленети се 92 килограми марихуана. Меѓу позначајните реализации се и разбиената мрежа на улични дилери и препродавачи на дрога на подрачјето на Прилеп, за што мерки на кривичен прогон се преземени против четири лица од Прилеп. Во април 2021 година беше сузбиена и шестчлена криминална група на патниот правец Прилеп – Росоман, во близина на с.Раец, при што беа запленети 200 килограми марухуана. Веднаш по моето враќање во МВР, уште во септември минатата година, беа запленети над 400 килограми дрога, беа сузбиени и две организирани криминални групи, во кои дејствувале 12 членови, спречени беа три меѓународни транспорти на дрога…“, рече Спасовски.
Според Спасовски, за постигнување на добрите резултати во работењето голема улога имаат и добрите услови кои раководството на МВР ги обезбедува за работа на вработените.
„Со враќањето во МВР, продолживме со реализација на заложбата за севкупно подобрување на професионалните услови за работа на полициските службеници, преку продолжување на проектот за реконструкција и изградба на полициските станици. Ова се рефлектираше со комплетно завршени градежни активности во периодот септември-декември 2020 на објектите на Аеродромската база Петровец и Полициското одделение Жеровјане, ОВР Гевгелија, ОВР Крива Паланкаи Полициска станица Бит Пазар, како и со изградбата на Центарот за санирање од катастрофи во Прилеп и на новите современи форензички лаборатории во Скопје“, истакна Спасовски, додавајќи дека и во 2021 година се продолжи со ист интензитет, па комплетно се реконструирани Регионален центар Југ, ОВР Кавадарци, Полициското одделение Дојран и објектот на ОВР Ресен, а во моментов интензивно се работи на реконструкција и санација на СВР Куманово, Полициското одделение Ростуше, како и објектот во касарна „Илинден“ за потребите на Специјалната антитерористичка единица „Тигар“.
Започнати се активностите за изградба на комплетно нов објект за ПС Аеродром, а Спасовски најави дека за многу скоро ќе започне и реновирањето на објектите во Прилеп, Чашка и Крушево.
„Впрочем, во таа насока говори и процентот на реализација на буџетските средствата во 2020 година во делот на капиталните расходи, кој на изнесуваше 98%, во споредба со реализацијата од само 17,43% до моето повторно враќање во министерството. Или, ако ги споредиме првиот квартал на 2020 година со првиот квартал во оваа 2021 година, односот на степенот на реализација на капитални расходи е 5,74% наспрема 17,85%“, посочи Спасовски.
„Почитувани пратеници и граѓани! Горд сум што за период од три и пол години, реконструиравме 54 објекти. Притоа, ја зголемивме и енергетската ефикасност и употребата на обновливи извори на енергија: поставуваме соларни панели, ПВЦ врати и прозорци, а склучивме и рамковна спогодба за набавка на високоефикасни инвертер клима уреди, со што ги исфрламе старите грејни тела и одиме кон зелена енергија, односно придонесуваме за заштеди во буџетот и намалување на загадувањето на животната средина. Големо внимание посветуваме и на набавка на опрема и униформи за вработените. Во текот на оваа и наредната недела пристигаат комплет униформи за Единицата за брзо распоредување, Единицата за обука и подршка при ОСПО, како и Единицата на интервентна полиција при СВР Скопје. Минатиот месец Одделението за претходница и сообраќајно-ескортно обезбедување при Одделот за заштита на определени личности и објекти, по цели 12 години доби на користење нова мотоциклистичка опрема, а за првпат полициските службеници во оваа организациска единица на министерствотодобија два вида на опрема – зимска и летна.
За обнова на униформи и опрема во буџетот за оваа година имаме обезбедено близу половина милијарда денари, што е еден од највисоките износи во историјата на министерството“, изјави Спасовски и потсети дека истовремено се обезбедени и средства за исплата на бонус плата на вработените во МВР за оствaрени над 150 часа прекувремена работа на годишно ниво во текот на 2020, кои ќе бидат исплатени во јуни, а веќе се исплатени бонус платите за 2017 и 2018 година.
