Четири години од крвавите настани во Собранието каде беа повредени пратеници, новинари, сниматели… По тој настан, осудени се неколку лица, амнестирани се лидерите на протестите „За заедничка Македонија“ и пратениците на ВМРО-ДПМНЕ кои ја отворија вратата за да влезе толпата во Собрание. Но, организаторите се сè уште на слобода. Обвинети во случајот за организација на „27 април“ се поранешниот претседател на Собранието, Трајко Вељаноски, ексминистрите Миле Јанакиески и Спиро Ристовски и поранешниот директор на Управата за безбедност и контраразузнавање (УБК), Владимир Атанасовски.
Во истрагата за овој предмет беа опфатени и бившиот премиер, Никола Груевски и ексразузнавачот од УБК, Никола Бошковски, меѓутоа и двајцата избегаа од државата. За нив е поднесен обвинителниот акт, но постапката ќе продолжи кога тие ќе бидат достапни на органите.
Вечерта на 27 април 2017 година речиси никој не беше рамнодушен на случувањата во Собранието… По нападот, актуелниот премиер Зоран Заев, тогаш како опозиционер најави дека ќе има одговорност за секој што учествувал во насилството. И тогашниот лидер на ВМРО-ДПМНЕ, Никола Груевски веднаш ги повика институциите да направат брза и ефикасна истрага, да ги откријат виновниците, да обезбедат докази и да ги изведат пред суд. Но, четири години подоцна, бегалецот Груевски од Будимпешта ги поддржа протестите кои се одржаа пред два дена за ослободување на насилниците, односно таканаречените „уставобранители“.
Четири години подоцна правдата ги пристигна само 16 луѓе кои првично беа осудени на затворски казни од над десет години или вкупно 211 години затвор за кривичното дело „терористичко загрозување на државниот поредок”, но, во февруари оваа година Апелација им ја намали казната од една до две години, или вкупно 188 години затвор за 16 осудени за крвавиот „27 април“.
Правосилната пресуда на Апелација за секој од осудените е следна: Митко Чавков – намалување на казната од 18 на 16 години затвор, Митко Пешов од 15 на 13 години затвор, Душко Лазаров од 15 на 13 години затвор, Горан Ѓошевски Леви од 15 на 13 години затвор, Оливер Поповски од 13 на 11 години затвор, Оливер Радулов од 10 на 9 години затвор, Мунир Пепиќ од 15 на 13 години затвор, Абдуљфета Алими од 7 на 6 години затвор, Младен Додевски од 12 на 11 години затвор, Јане Ченто од 15 на 13 години затвор, Горанче Анѓеловски од 12 на 11 години затвор, Игор Југ од 12 на 11 години затвор, Влатко Трајковски од 15 на 14 години затвор, Вилијам Михајловски од 14 на 13 години затвор, Никола Митревски – Кољо од 15 на 14 години затвор и Александар Василевски – Нинџа од 8 на 7 години затвор.
Во овој предмет, покрај сега правосилно осудените, беа опфатени уште 15 лица. Меѓутоа, тие добија амнестија со законот кој беше донесен во Собранието во декември 2018 година.
Амнестијата ги опфати петтемина пратеници: Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, од кои првите тројца потоа гласаа и за уставните измени, односно за промена на името. Амнестирани беа и водачите на протестите „За заедничка Македонија“, Борис Дамовски, Богдан Илиески-Бетмен и Владо Јовановски.
Игор Дурловски, кој беше во оваа група, воопшто и не побара амнестија, но доби ослободителна пресуда.
Со амнестијата се спасија и браќата Стефан и Михаил Младеновски, Захарие Симовски, Елена Доцевска-Божиновска, Иван Цветановски, Илија Славески и Митре Питроповски од патриотските здруженија.
Покрај 15 обвинети, амнестирани беа уште 10 други лица опфатени во помалите предмети кои се однесуваа на учество во толпа.
Дали правдата ќе ги стигне организаторите на „27 април“?
Д.М.
