Привршува подготовката на материјалите по новата наставна програма за првоодделенците, по која ќе учат веќе од септември. За предметот природни науки во тек е печатење на нов материјал на авторките: Билјана Лазареска, Биљана Стојановска, Соња Кирковска, и Нела Слезенкова Никовска.
Авторката Билјана Лазареска вели дека е создаден прекрасен материјал, кој ќе биде интересен и возбудлив за учениците. „Тие се најсреќни во училницата кога изведуваме експерименти и кога имаат пред себе наставен материјал кој е шаренолик и богат со илустации”, истакнува Лазареска.
Според Лазареска, содржината на материјалот е разбирлива за учениците, а целта е да се воведуваат во наставната материја преку активности и игри и да ги разберат аспектите на родова еднаквост, интеркултурализмот, инклузијата, заштитата на животната средина, почитувањето, правата и слично.
“Се надеваме дека овој учебник ќе овозможи еден поинаков пристап во наставата и ќе ги зголеми компетенциите на знаења, способности, вештини и ставовите. Ќе им овозможи на учениците учење со разбирање кое помага во развој на критичкото размислување и креативноста, што е и целта на самите реформски процеси”, вели Лазареска.
Спроведувањето на новата Концепција, која МОН ја изработи во соработка со Бирото за развој на образование, стартува од новата учебна година во прво и четврто одделение, за што се развиваат и изработуваат материјали за учење што се целосно усогласени со новите наставни програми. Промените ќе се прават етапно, а целосната имплементација на реформата во деветолетката се очекува да заврши за 5-6 години.
Новите материјали за учење се изработуваат во координација со БРО, а исто така материјалот го разгледува и рецензентска комисија и универзитетски професори.
