За време на работната посета во Битола, прашан од новинарите за локалните избори, премиерот Заев кој е воедно и претседател на владејачката СДСМ нагласи дека му е драго што довербата кај граѓаните за сите потенцијални кандидати е голема и затоа сакаат да се кандидираат добри кандидати, звучни имиња, одговорни луѓе, докажани во професијата. Тој најави заеннички настап со ДУИ, БЕСА и ДПА на локалните избори.
„Тоа е една голема предност која што не прави фаворити на изборите. Покрај тоа што водиме по анкетите довербата е голема, се верува дека ќе победиме. Но, на крајот граѓаните одлучуваат. Јас можам да ви кажам заради тоа што сме коалициони партнери и со ДУИ, и со БЕСА и со ДПА, имаме коалиција, заедно ќе настапиме за локалните избори. Нормално деталите не можеме да ги кажеме уште оти не ги знаеме имињата, но дефинитивно ги знаеме принципите на коалицирање. Се знае во првиот круг одат сите, после тоа се поддржуваме, фер, така на граѓаните ќе им оставиме сами да ни кажат патот кој е, кој треба на крајот да биде избран во сите други градови“, истакна Заев.
На новинарско прашање во врска со кандидатот за градоначалник на Битола, претседателот на СДСМ Заев одговори дека првите истражувања покажуваат фаворитска основа и за сегашнаа градоначалничка и за уште неколку квалитетни луѓе.
„Според истражувањaтa градоначалничката Наташа Петровска е еден од најдобрите градоначалници во државата, ама тоа го мисли Зоран Заев. Да видиме битолчани што мислат. Првите истражувања покажуваат фаворитска основа и за неа и за уште неколку наши квалитетни луѓе овде. Но се надевам дека втората и третата анкета коишто се во тек ќе го кажат конечното, затоа што само тогаш можеме да кажеме дека ги слушаме граѓаните кои ни даваат мандат да сработиме и да оставиме зад себе задоволство. Секој пат можеме повеќе. Тоа што е сработено во Битола во минатите години мислам дека покрива два до три мандати на поранешните градоначалници што оставиле. Зошто? Заради тоа што затекнавме блокирана општина, сега е одблокирана, развиени се проекти буквално насекаде низ Битола“, истакна Заев пред новинрите во Битола.
Инаку, премиерот заедно со министерот за транспорт и врски, Благој Бочварски и градоначалничката на Битола, Наташа Петровска беа во увид на реконструираниот регионален пат Битола – Нижеполе – Ски центар „Стрежево“, во должина од 5,5 километри, кој наредните денови по техничкиот прием ќе биде пуштен во употреба. Според премиерот Зоран Заев, граѓаните од Битола и регионот сега имаат лесна врска со рекреативните локации под Пелистер, како и со ски центарот „Стрежево“.
