Обезбедувањето безбедно засолниште за оние што бегаат пред смртта од талибанците за нас е задача, што ги надминува сите други, вели албанскиот премиер Еди Рама, во интервју за италијанските медиуми, потсетувајќи при тоа на егзодусот на Албанците.
Пред 30 години бевме Авганистанци кои бараа гостопримство од другата страна на морето. Ние, во тоа време изгледавме како туѓинци за италијанскиот народ и европското јавно мислење, како што денес изгледаат Авганистанците. Од друга страна, имаме традиција која треба да ја почитуваме. Албанија е единствената европска земја која беше домаќин на Евреите пред и по завршувањето на Втората светска војна. Тоа е кодекс на чест што не обврзува да бидеме гостопримливи. Кодекс, според кој куќата на секој Албанец му припаѓа на Бога и на гостинот, изјави Рама, пренесува АБЦ Њуз Албанија.
Понатаму, тој вели дека треба да продолжат да го прават тоа и за нивните деца, кои тоа гостопримство треба да го негуваат како скапоцено богатство, тоа чувство на одговорност кон другите во тешкотии, да бидат деца на народ кој во различни моменти од својата историја се потпираше на гостопримството на другите, пренесува дописничката на МИА од Тирана.
