По претставниците од политичките партии, денеска и самите кандидати за градоначалници потпишаа Kодекс за демократски и фер избори.
На денешното потпишување на Кодексот за фер избори што се одржа во просториите на Град Скопје се случи инцидент по обраќањето пред новинарите на независната кандидатка за градоначалник, подржана од ВМРО-ДПМНЕ, Данела Арсовска.
Имено, откако новинарот Саше Ивановски – Политико ѝ постави прашања за нејзиниот политички и општествен ангажман, кандидатката Арсовска ја напушти говорницата и ја прекина прес-конференцијата. Притоа, новинарот Ивановски се обиде да добие одговор на своите прашања, но беше грубо истуркан од телохранителите на Арсовска.
Од ВМРО-ДПМНЕ пак велат дека го осудуваат нападот врз Данела Арсовска од страна на Саше Ивановски – Политико, кој го сметаат како резултат на нервозата на Петре Шилегов пред избори.
ПРИЈАВИ И ПОЛИТИЧКИ ОБВИНУВАЊА
Управата за финансиска полиција до ОЈО за гонење на организиран криминал и корупција поднела кривична пријава против пет физички и три правни лица за злоупотреба на службената положба и перење пари во општина Петровец. Меѓу пријавените е и актуелниот градоначалник и кандидат Борче Митевски, од ВМРО-ДПМНЕ.
Од СДСМ велат дека кандидатите на ВМРО-ДПМНЕ за градоначалници не можат да понудат ништо освен деструкција и враќање на режимот.
„Впрочем најголем дел од нив се луѓе на Никола Груевски, луѓе кои се обвинети за кривични дела кои Мицкоски лажно ги претставува како чесни и нови лица. Меѓу нив е и актуелниот градоначалник и кандидат на Мицкоски за општина Петровец, против кого денеска е поднесена кривична пријава за злоупотреба на службената положба и за перење пари.
Но ова не е единствен пример за криминално однесување на кандидатите на ВМРО-ДПМНЕ и Мицкоски за градоначалници.
Во медиумите се појавија написи за сомнителното минато на кандидатот за градоначалник во Гази Баба, Бобан Стефковски. Мицкоски и ВМРО-ДПМНЕ не одговорија дали е точно дека Стефковски, во 2002 и 2003 во два наврати бил притворан поради неовластено производство на опојни дроги
Истовремено, во јавноста постојат документи дека кандидатката на општина Крушево, Билјана Проеска, е осудувана во 2015 година на условна казна затвор поради фалсификување исправа.
Пресуда со условна казна има и кандидатот за градоначалник на Бутел, Дарко Костовски за учество во тепачка. Ете ја понудата на Мицкоски за овие избори“, велат од СДСМ.
Лидерот на ВМРО-ДПМНЕ, Христијан Мицскоки, смета дека ако власта има сериозна намера и ако вистински сака, анкетна комисија во Собранито може и треба да се свика веднаш.
Тој е подготвен, како што рече денеска, да поднесе ново барање, со употреба на придавката „Северна“, а поради тоа, ако треба, и да претрпи политичка штета, само за да се дознае и утврди вистината за несреќата во Тетово. Вистината мора да се знае, потенцира Мицкоски, и виновниците мора да се казнат.
Мицкоски уште еднаш обвини дека власта го смени Законот за градба и дозволи модуларната болница во Тетово да се постави „на диво“. Не се потребни меѓународни истраги, оцени, ниту да доаѓаат комисии од „ваму или од таму“, зашто работата е едноставна. Постапката е управна, рече, а процедурата промашена.
ВЛАДИНИ РЕФОРМИ ПРЕТСТАВЕНИ КАКО ПАРТИСКИ
Демократската Унија за Интеграција ќе продолжи силно да се посвети на унапредување на децентрализацијата на власта од централно на локално ниво, особено во однос на децентрализацијата и фискалната консолидација, изјави Фатмир Бесими на прес-конференција на ДУИ.
„Делот на распределбата на ДДВ за општините се зголемува од 4,5% на 6%, истотака се зголемува и учеството на распределбата на персоналниот данок од 3% на 6% за општините. Ќе се формира Фонд на перформанси, каде општините што успешно управуваат со буџетот ќе бидат наградени. Се формира Фонд на еднаквоста, каде општините кои се помалку развиени и коишто имаат помалку ресурси, ќе добијат повеќе средства“, истакна Бесими.
Всушност ова што денес го презентираше Бесими во име на ДУИ, пред два дена исто така го презентираше во име на Владата како министер за финансии, дека Владата ги прифати предложените измени и дополнувања на Законот за финансирање на единиците на локалната самоуправа.
Д.М.
