Втора половина од изборната кампања со намалена посетеност на митинзите поради дождливото време.Кандидатите за општинските функции ги интензивираат своите активности . На средби со граѓаните и преку медиумите се ветува подобра иднина на општините, лидерите водат кампања како за парламентарни избори. ДКСК не гледа незаконитост во рекламирањето на Арсовска со средства од ВМРО ДПМНЕ, СДСМ во водство пред ВМРО ДПМНЕ во анкетата на Стратум, 89- годишна жена кандидат за советник, опожарени партиските простории на ДУИ во Кичево.
ДКСК НЕ ГИ ПРИФАТИ ПРИГОВОРИТЕ НА ЛЕВИЦА И СДСМ
На денешната 52-ра седница на ДКСК ги одби приговорите кои на 5 октомври до неа ги поднеле политичката партија Левица и коалицијата „Најдоброто за мојата општина” предводена од СДСМ. На седницата ДКСК одлучи постапката по изнесените наводи да ја запре. Членот на ДКСК, Нури Бајрами, посочи дека наводите од приговорот на „Левица” за финансирањето на политичкото рекламирање на кандидатката Данела Арсовска, не се потврдени и правно неиздржани и затоа ДКСК не е во можност да предлага мерки во согласност со своите надлежности.
Претседателот на Државната комисија за спречување на корупцијата, Билјана Ивановска во врска со вториот приговор, рече дека според распоредот од ДИК, независниот кандидат Максим Димитриевски кој е кандидат за градоначалник на Куманово има добиено три локации, додека во приговорот стои дека има девет локации дополнително обезбедени преку системот „прв дојде и прв услужен”.
ИЗБОРНА АНКЕТА НА СТРАТУМ
Агенцијата СТРАТУМ РиД последната недела од септември и првата недела од октомври, спроведе истражување во кое е вклучена и секција за расположението на граѓаните како и рејтинг на Институции и политички партии. Од граѓаните кои ќе излезат на гласање, 26.1% се определиле за СДСМ, а 23.8% се определиле за ВМРО-ДПМНЕ.
КАЗНА ЗА ИСЕЧЕНО ДРВО ЗА ПОДОБРА ВИДЛИВОСТ НА КАНДИДАТ ЗА ГРАДОНАЧАЛНИК НА БИЛБОРД
Инспекторатот на Град Скопје, денеска на Општина Кисела Вода и одговорното лице им изрече максимална казна во висина од 1.800 евра поради бесправно исечено дрво на булеварот „Борис Трајковски“, за подобро да се види рекламата од изборната кампања на кандидат за градоначалник на билбордот. Дрвото е исечено без дозвола и одобрение од Град Скопје.
ОПОЖАРЕНИ ПАРТИСКИ ПРОСТОРИИ
Пожар избувнал синоќа во 1:10 часот по полноќ во хотелот „Арабела” во Кичево, при што била опожарена канцеларијата на ДУИ , каде што беше сместен изборниот штаб на оваа партија. На местото излегле полициски службеници од Полициската станица Кичево, соопшти МВР. Пожарот најпрво бил локализиран и околу 2 часот и целосно ликвидиран. Како што соопшти МВР во пожарот нема повредени лица. Материјалната штета и причините за пожарот допрва ќе се утврдваат.
89-ГОДИШНА ЖЕНА НАЈСТАР КАНДИДАТ ЗА СОВЕТНИК
На локалните избори кои ќе се одржат на 17 октомври најстар кандидат за советник е 89-годишна жена предложена од Единствена Македонија во скопски Аеродром, додека најмладиот носител на листа е кандидат на партијата Родина во општина Конче со само 19 години.
ПАРТИСКИ ПРЕПУКУВАЊА
Дарко Каевски од СДСМ, на прес конференција обвини за скандал со парцелите од над 30.000 метри квадратни земјиште во Долно Соње од човек близок до градоначалникот Трпковски.
Од ВМРО-ДПМНЕ реагираат со контраобвинение за Дарко Каевски, за кој прашуваат како станал единствениот триесетгодишник во Македонија, кој не е иноватор или ИТ инжинер, а што има 4.070.000 денари депозит во банка.
АКТИВНОСТИ НА ПОЛИТИЧКИТЕ ПАРТИИ
ВМРО-ДПМНЕ
Убеден сум во политички пресврт во Македонија што ќе се случи по 17 октомври, изјави Христијан Мицкоски во Битола.
„И јас ве повикувам на масовна излезеност. Масовна излезеност уште рано наутро масовно да излеземе затоа што тивкото мнозинство кое што има што да каже, а за жал никој денеска не го прашува на овие избори јас сум убеден дека ќе биде гласно и дека го заокружи бројот 7 за идниот градоначалник на Битола и за идната победничка листа предводена од ВМРО-ДПМНЕ, листата на коалицијата „За обнова на Македонија“. “
СДСМ
Од СДСМ ветуваат 100 милони евра за сите општини за изградба на подобра инфраструктура
„„Како одговорна и домаќинска партија остануваме целосно посветени на градење современа инфраструктура во секоја општина, во секој град, во секое село. Комуналната инфраструктура ќе остане во фокусот на нашето работење, а општините плански ќе ги зајакнуваат капацитетите на јавните градски претпријатија. “, велат од СДСМ.
АЛИЈАНСА ЗА АЛБАНЦИТЕ и АЛТЕРНАТИВА
Генералниот секретар на Алијанса за Албанците и актуелниот градоначалник на Гостивар, Арбен Таравари и кандидатка за градоначалник на Град Скопје, Данела Арсовска имаа кафе средба на која што заклучија дека за модерни градови потребни се квалитетни, ефикасни и брзи решенија.
Кандидатот на АА-А за општина Тетово, Вулнет Мурсели преку својот профил на ФБ откри дел од својата програма за реконструкција на жичарницата Тетово-Попова Шапка
НЕЗАВИСНИ
Независниот кандидат и актуелен градоначалник на Општина Дебрца Зоран Ногачески пред граѓаните на општината посочи дел од инфраструктурните проекти спроведени во неговиот мандат.
Според Ногачески, основна цел на изминатата локална власт бил подигањето на квалитетот на живеење, со инвестиции во безмалку сите села, од најмалите до најголемите, согласно принципот дека секој е поеднакво важен.
ДУИ
Демократската унија за интеграција (ДУИ), денеска ја претстави Изборната програма за општина Липково. Зекирја Шаини, носител на листата кандидати за советници на денешната прес -конференција рече дека програмата изработена за развој на Липково е за подобар квалитет на животот на нејзините граѓани и се фокусира на подобрување на патната инфраструктура, реконструкција и одржување на водоснабдување, канализација и мрежи за наводнување, управување со отпад, квалитетно образование, поголема здравствена заштита и многу други сфери на општествениот живот.
Градоначалникот на Општина Чаир, Висар Ганиу воедно и кандидат за втор мандат , денеска оствари средба со пензионерите на која им ги предаде клучевите од Центарот за пензионери, што е наменет како место за средба на жителите на општината во напредна возраст, информираат од Општина Чаир
ЕДИНСТВЕНА МАКЕДОНИЈА
Кандидатите за советници од советничката листа „Единствена Македонија“ ги истакнаа заложбите кои ќе бидат во фокусот на нивното работење доколку добијат мандат во Советот на Општина Охрид.
ИНТЕГРА
Натпартискиот кандидат за градоначалник на Берово од партијата Интегра, Горан Алачки, денеска оствари средба со граѓаните на ромското маало од Берово. На средбата, како што рече Алачки, низ разговор ја слушнал нивната вистина и големиот број проблеми со кои се соочуваат во нивното секојдневие, и ја презентираше неговата програма во која, како што додаде, се содржани проекти кои ќе бидат насочени токму во културата и уметноста во Малешевијата.
ГРАД СКОПЈЕ
Кандидатката за градоначалник на Скопје од „Зелен хуман град“, Ана Петровска ќе одржи прес-конференција на тема „Решенија за Вардариште“. На средба со граѓаните на Гази Баба , Петровска истакна дека се борат против дивата депонија Јурумлери, која е една од многуте покрај Вардар. Таа се прави со знаење на општината Гази Баба, која наместо да ја исчисти, самата фрла отпад, за да не плати прописно депонирање во Дрисла. На оваа локацаија се истура и талог од септички јами на приватни куќи од оваа општина, што депонијава ја прави уште поголемо жариште на зарази, во време на пандемија.
Данела Арсовска , кандидатка за градоначалничка на Скопје, поддржана од ВМРО ДПМНЕ,: Скопје ќе биде град на фестивалите. Планираме одржување на најмалку 12 фестивали, за секој месец во годината по еден фестивал. Златно славејче кое е симбол на Скопје ќе се возобнови. Градот ќе ја продолжи и ќе ја зголеми поддршката на Скопје Џез Фестивал.
Градоначалникот на Град Скопје и кандидат за втор мандат, Петре Шилегов, денеска посочи дека скопската Зоолошка градина станува регионална туристичка атракција. Дино паркот, фламингата, пингвините и слонови како дел од новата понуда на Скопје ЗОО, , директно придонеле за зголемениот интерес за посети кој во просек се зголемил на над 30.000 посети неделно.
МИТИНЗИ
Изборни активности на СДСМ „Најдоброто за мојата општина“ во Дебарца, М. Брод, Долнени, Кривогаштани и Прилеп, на централниот настан во Крушево ќе се обратат претседателот Зоран Заев и кандидатот за градоначалник Томе Христоски, во Чашка ќе се обратат потпретседателот Фатмир Битиќи и кандидатот за градоначалник Горан Стојановски. Оливер Спасовски го претстави кандидатот за градоначалник на Општина Ранковце, Даниел Крстевски”, Сања Лукаревска во Врапчиште со кандидатот за градоначалник Џезми Мамути и ностлот на советничката листа Војче Исакоски.Прес конференции на кандидатите за градоначалници на општина Аеродром, Александар Филиповски и кандидатката за советничка во Штип, Маријана Рогожарска Поповска.
ВМРО-ДПМНЕ со изборната кампања „Создади нова иднина!“ во Василево, Босилово и Ново Село, во Битола, претседателот на на партијата, Христијан Мицкоски го претстави кандидатот за градоначалник Тони Коњановски. Изјави за медиумите на Бобан Стефковски, кандидат за градоначалник на Гази Баба , Наташа Котлар, кандидат за градоначалник на општина Центар од Водно и на кандидатот Тимчо Муцунски за дигитализирање на сите услуги во Општина Аеродром.
Демократската унија за интеграција ја продолжuva изборната кампања во Oпштина Куманово каде со презентација на листата на кандидати за советници.
Изборни активности на Движењето „Одлучно за промени“ предводено од Зелената партија ДОМ и ЛДП во Шуто Оризари и Петровец.
„Твоја партија“ на средби со граѓани во Скопје.
Изборни активности на БЕСА во Брвеница и Голема Речица.
Д.Мишев
