Јас ги разбирам колегите коишто бараат повисоки плати, со инфлацијата на светско ниво, нашите плати стануваат помалку вредни, а стандардот понизок, но не го разбирам раководството на СОНК, вели за ФРОНТЛАЈН Влатко Секулоски од Прогресивен синдикат на образованието.
Тој истакнува дека одлуката за генерален штрајк на СОНК била донесена во потесен круг на раководството и вели дека е нејасно дали демократијата во СОНК е редовна пракса или алатка зад која се затскрива раководството.
„Одлуката за генерален штрајк беше донесена во потесен круг на раководството, не знам кое тело и во колкав состав, но секој еден член не беше прашан дали е за штрајк. После „усната“ понуда од владата, раководството на СОНК реши да го праша секој еден штрјкуваш дали ја прифаќа понудата. Останува нејасно дали демократијата во СОНК е редовна пракса или алатка зад која се затскрива раководството?“, вели Секулоски.
Околу транспарентноста на СОНК со членовите, Секулоски го поставува прашањето дали тајноста на трошењата создава вистински синдикализам или елити кои си служат првенствено самите себе.
„Не можам да ја заобиколам мојата омилена тема – транспарентноста. Секој еден член што беше прашан за тоа дали 10% е доволно зголемување на неговата плата не знае колку од таа иста плата СОНК исплаќа за плати, службени ручеци и патувања на раководството и хонорари на регионалните претставници. Тоа е сепак тема за разговор меѓу членовите и раководството на СОНК, јас можам само да опсервирам. Во поширок контекст прашање е дали тајноста на трошењата создава вистински синдикализам или елити кои си служат првенствено самите себе, ова прашање е посебно валидно ако се има предвид начинот на кој што се изведе последниот реизбор на раководството на СОНК, за којшто нема да елаборирам во детали“, истакнува Секуловски.
Секуловски вели дека СОНК иако поминале осум години, и сите правни служби со прст не мрднале да ги оспорат „заменски наставници“.
„Во контекст на штрајкот не може да се заобиколи и темата за заменски наставници. За нејзиното донесување и неукинување може да покажуваме со прст кон повеќе политички гарнитури, но да ја видиме улогата на СОНК. Во времето кога се воведоа тн. „заменски наставници“. СОНК не се сеќавам дека истото ова раководство на СОНК мрдна со прст против „заменските наставници“. Поминаа повеќе од осум години и СОНК со сите свои правни служби не ни проба да ги оспори „заменските наставници“ пред уставниот суд,. Зошто постојат само „заменски наставници“, а не и заменски пожарникари, полицајци, лекари, административци…? – Прашајте во СОНК!“, дециден е Секулоски.
Тој потенцира дека барањата за повисоки плата се легитимно право, одбивањето на понудените 10% е исто така легитимно право на просветните работници.
Дали едно раководство со тајни примања и пракси на реизбор коишто се менуваат по потреба може да биде легитимно и да води штајрк во интерес на просветните работници, наместо во купување на уште еден мандат на тајни трошења, јас не сум убеден, вели во разговорот со Фронтлајн, Влатко Секулоски од Прогресивен синдикат на образованието.
Ј. Ѓорѓиоски/ ФРОНТЛАЈН
