ЏАБИР ДЕРАЛА
Деновиве разменив(ме) многу честитки, си упативме убави зборови и мисли едни на други. Добив, како и секоја година, зилиони честитки во различни формати – зборови, гифови, стикери, емотикони, видеа, линкови… Меѓу оние со кои разменив убави зборови и желби се мои поблиски и подалечни пријател(к)и, колешки и колеги од медиумите и невладините, читател(к)и, уметници, интелектуалци, работници, политичари…
Вечерва ќе соберам на едно место еден дел од пораките што ги упатив во изминатите неколку дена, во пресрет на Новата 2023 година. Сигурен сум дека во океанот од пораки ќе пропуштам многу убави мисли и пораки, но ништо не изгубено, може овој текст и да се продолжи.
„Среќна Нова. Нека оваа година биде исполнета со искачување кон врвот. Со ледена смиреност во мислите, со оган во срцето.“
„Среќна Нова Година, другарки и другари, колешки и колеги, дами и господа. Нека ова биде година на Победата!“
„Среќна Нова, драг мој. Нека нѐ следи успех, нека нѐ служи здравје.“
„Учиме заедно и си помагаме едни на други. Ти посакувам среќна Нова и на Тебе и семејството, сите Твои блиски и далечни.“
„Среќна Нова, драг пријателе. Нека те следат здравје, успех и радост Тебе и Твоето семејство. Наше е да се потрудиме да бидеме силни и да им го разубавиме животот на нашите блиски.“
„Мил мој пријателе. Толку си внимателен. Толку далеку и во подрачје каде што те придружува смртна опасност, а ти наоѓаш време да ми упатиш убави желби за конкретни нешта кои се животно важни за мене. Ти благодарам, драг мој. Се надевам дека 2023 година ќе биде што е можно подобра, за тебе, за мене и за оние што ги сакаме. Нека ти се случат најдобрите работи што може да се случат. Чувај се, те молам.“
„Среќна Нова Година и Тебе, другарке. Повеќе здравје, среќа и успех во Новата Година.“
„Среќна Нова. Да останеме на Првата линија.“
„Сѐ најдобро за Тебе, твоето семејство и сите луѓе што ги споделуваат и се залагаат за нашите заеднички вредности.“
„Среќна Нова, драг пријателе, Вам и на Вашето семејство. Нека ова биде година на Победата над злото. Слава Україні!“
„Среќна Нова! Многу сум среќен што пишуваш толку убаво и тоа токму за нас. Фала ти многу. Препорачувам да не им одговараш на глупаците и квази неутралците. Не си го губи времето. Твоите колумни се одговор на нивните штапски налози и ниски политички страсти и амбиции.“
„Нека оваа година биде година на уште повеќе победи и лидерство. Нека биде и година на заедништво во остварување на македонските сништа и стремежи. Сѐ најубаво на семејството, блиските, пријателите и соборците. Среќна Нова Година!“
„Во Новата година со Нова енергија! Да наздравиме за новите идеи, за новите, уште повисоки цели, ЗА ВРЕДНОСТИТЕ, за предизвиците што ќе ги претвориме во можности, заедно, одлучно и храбро. За нашите заеднички победи во Новата Година. Со полна брзина на автопатот кон нови, поголеми достигнувања!“
Оваа беше прифатена од колегиумот на Цивил: „Како што изминува една од најтешките години во изминатите децении, НИЕ сме пред уште една година на борба за ДЕМОКРАТИЈА, за СЛОБОДА, за МИР, за ПРАВДА… НИЕ ЌЕ БИДЕМЕ ДЕЛ ОД ТАА БОРБА! СЛОБОДНИОТ СВЕТ ЌЕ НАДВЛАДЕЕ! Среќни празници од ЦИВИЛ.“
Оваа е од Фронтлајн: „Секогаш на Првата линија. СРЕЌНА НОВА ПОБЕДНИЧКА ГОДИНА.“
А ова е моја, од мене, ја споделив на моите профили на социјалните мрежи: „Нека надежите и сништата станат стварност. Нека Храброста нѐ води до Слободата. Нека Патот до Мирот и Човечкото Достоинство биде чист и пресретлив. Слава на Хероите на Мирот! СРЕЌНА НОВА ПОБЕДНИЧКА ГОДИНА!“
Како што реков, има уште многу… Нотификациите не стивнуваат ни вечерва, на 1 јануари.
Од текстот ги изоставив имињата на луѓето на кои им ги упатив пораките, од разбирливи причини. Впрочем, голем дел од овие пораки можам искрено да ги упатам на многумина други, дури и далечни, па и непознати.
Не е се во напишаните пораки. Во таа смисла, еве и за една средба во пресрет на новогодишната ноќ. Низ маглата на замаглените очила и одблесоците од неонските светла во молот каде што правев last-minute shopping, го здогледав мојот омилен и жесток неистомисленик. Кој следи Цивил, знае за кого зборувам. Се гушнавме како стари добри пријатели и си посакавме сѐ најдобро. Искрено и пријателски. И знам дека и оваа година ќе останеме доследни неистомисленици. Знам дека во нашите разговори јас ќе бидам во право, а тој ќе греши, ќе ме нервира и јас ќе го нервирам (обратното тој ќе го напише кај себе, нели?). Не сме делеле школска клупа, биро, канцеларија, бизнис, друштво, кафеана – никогаш. Идеолошки непријатели сме. Станавме пријатели низ „непријателството“ што си го упатува(в)ме сето ова време.
Тука некаде ќе завршам со оваа моја новогодишна белешка со пораката: Посакајте им добро на сите и не очекувајте да ви се врати. Добрината во срцето е награда сама по себе. Тешко е да се најде сила за добрина, знам. Тешко е да се најде сила за подавање рака. Но сите имаме исти сништа и надежи, сите имаме исти стравови и болки. Заедно сме во овој тежок живот. За да се ископа дупка за некого, треба прво тој што копа да биде во неа. Често и таму да остане. Полесно е да се гледа нагоре кон небото. Таму има место за сите. Среќна Нова!
ПС. Овој текст, како и многу други порано и многу други во иднина, го посветувам на сите луѓе со добро срце и бистар ум, со поглед кон небото. И на сите што ќе го откријат тоа во себе оваа или некоја друга година. Никогаш не е доцна да се крене главата кон небото. Но, што порано, тоа подобро.
Извор: CivilMedia | Текстот е личен став на Авторот. Дозволено е преземање на текстот според лиценцата Creative Commons 4.0.
