Ни се погодило – имаме премиер кој е all-in-one, вели директорот на Демокраси Лаб и аналитичар, Сефер Селими, кој ја анализира состојбата со истрагата за трагедијата во Кочани.
„Премиер, партиски лидер, претседател на младински и женски форуми, портпарол, обвинител, судија, истражител, експерт по судска медицина, па дури и мастер-уредник за медиумско известување.
Најмалку што може да се констатира е дека власта веќе го има компромитирано целиот процес, кој тешко дека ќе резултира со неселективна правда“, вели Селими.
Седум полициски службеници под раководство на министерот Тошковски, се во притвор и осомничени дека со свои постапки или непостапување, овозможиле дискотеката да работи најмалку една година незаконски. – Министерот е на слобода, ја води истрагата и ни кажува кој е, а кој не е виновен. (Претходниот министер, патем, никој ни не го споменува.)
Цела година, дискотеката работела со фалсификувана лиценца, од кои 9 месеци под водство на новата „робусна” влада. Во затвор се екс-министерот Бектеши и екс-државниот секретар. Актуелните? Ниту се во радарот на јавноста, а уште помалку земени на распит или поставени во ист контекст со нивните претходници.
Поранешни директори на Пазарна инспекција и Директор за заштита и спасување се во притвор бидејќи наводно дозволиле клубот да работи диво, иако не се на функција веќе 9 месеци. Актуелните директори? Слободни – и дури ја водат “робусната” вонредна инспекција за други објекти.
Тројцата последни градоначалници на Кочани се во притвор – најмалку еден од нив, според самиот Премиер, е „многу добар човек”, и тој лично гарантира за тоа.
Овие јавни пораки, сигурен сум, немаат за цел да влијаат во независноста на истрагата – барем не во неговиот случај… нели, бидејќи самиот Премиер и неговата влада не убедуваат дека обвинителството и судството не си ја вршат како што треба својата работа, и токму затоа граѓаните не им веруваат повеќе од 2%.
- Ред други институции (Пазарна, Трудова, Финансиска, УЈП, Транспорт и др.) кои потенцијално носат сериозна одговорност, се кријат зад “фалсификуваната лиценца” што премиерот ја мафташе на прес-конференција – документ кој патем треба да биде доказен материјал во обвинителство, а не во рацете на „кадијата”.
Но, ни се погодило – имаме премиер кој е all-in-one:
Премиер, партиски лидер, претседател на младински и женски форуми, портпарол, обвинител, судија, истражител, експерт по судска медицина, па дури и мастер-уредник за медиумско известување.
Најмалку што може да се констатира е дека власта веќе го има компромитирано целиот процес, кој тешко дека ќе резултира со неселективна правда.
Драги мои, секоја трагедија носи болка за целото општество, создава колективна траума, и доаѓа со најскапо платени лекции. За жал, ние тврдоглаво одбиваме да ги учиме тие лекции – и затоа, тие постојано ни се повторуваат.
