Русија и САД извршија размена на затвореници во Абу Даби на 10 април, токму во моментот кога претставниците на двете земји се состанаа на дипломатски разговори во Истанбул, објави Вол Стрит Журнал (WSJ).
Москва ја ослободи Ксенија Карелина, американско-руска двојна државјанка обвинета за предавство за наводно донирање 51,80 долари на непрофитната организација Разом за Украина, пишува WSJ. Минатата година, таа беше осудена на 12 години затвор за, како што го претставија руските власти, финансирање на украинските вооружени сили.
Во замена, Вашингтон, наводно, го ослободил Артур Петров, германско-руски двоен државјанин, кој беше уапсен во 2023 година на Кипар на барање на САД за наводен извоз на чувствителна микроелектроника.
„Американската Ксенија Карелина е во авион за враќање дома во Соединетите држави“, изјави американскиот државен секретар Марко Рубио на социјалните мрежи.
Рубио го препиша нејзиното ослободување од рускиот притвор на американскиот претседател Доналд Трамп, додавајќи дека Трамп „ќе продолжи да работи за ослободување на сите Американци“.
„Размената ја покажува важноста да се одржуваат отворени линиите на комуникација со Русија, и покрај длабоките предизвици во нашите билатерални односи“, рече портпаролот на ЦИА, објави WSJ.
Директорот на ЦИА Џон Ретклиф и висок функционер на руското разузнавање преговарале за размената, изјави неоткриен функционер на ЦИА за WSJ.
Според изворот на весникот, Ретклиф бил присутен на аеродромот во Абу Даби каде што била извршена размената.
Нејзиното судење беше одржано во истиот суд во Екатеринбург каде новинарот на Волстрит журнал Еван Гершкович беше осуден за шпионажа и осуден на 16 години затвор во јули минатата година, пренесува Си-ен-ен.
Гершкович беше ослободен со историска размена на затвореници во која беа вклучени поранешниот американски маринец Пол Вилан, истакнатиот критичар на Путин и постојан жител на САД Владимир Кара-Мурза и руско-американската новинарка Алсу Курмашева.
Тие беа разменети за голем број руски државјани кои се држат во неколку земји, вклучувајќи го и осудениот атентатор Вадим Красиков.
Ова е второ ослободување затвореници договорено меѓу САД и Русија откако Трамп ја презеде функцијата. Москва го ослободи Марк Фогел, американски учител кој беше затворен во Русија под обвинение за дрога, во февруари.
Иако американските власти не кажаа што добива Русија во замена за ослободување на Фогел, американскиот советник за национална безбедност Мајк Волц рече дека договорот е знак дека Трамп напредува во неговите обиди да посредува за мировен договор меѓу Русија и Украина.
Русија уапси многу американски државјани од почетокот на војната во Украина, при што неколку Американци сега отслужуваат долги казни или чекаат судење. За време на поранешниот претседател Џо Бајден, Белата куќа ја обвини Москва дека ги организирала апсењата со надеж за идна размена на затвореници за Русите кои се држат во САД.
Драган Мишев
