Лидерот на партијата Македонски концепт Петар Богојески, коалиционен партнер на владејачката ВМРО-ДПМНЕ, соопшти дека вчера се сретнал со премиерот Христијан Мицкоски и на таа средба договориле прераспределба на позиции и институции кои ќе ги раководи Македонски концепт во рамки на извршната власт, а било потврдено дека Богојески ќе раководи со друга институција. Тој во моментов е директор на Националната агенција за европски образовни програми и мобилност, а беше именуван во април 2025.
„Согласно Одлуката на Претседателството на политичката партија Македонски концепт од 23.06.2025 година, денес остварена е официјална средба помеѓу претседателот д-р Петар Богојески и претседателот на ВМРО-ДПМНЕ д-р Христијан Мицкоски, на која беше констатирано следното: Прво, потврдена е добрата соработката во рамки на Коалицијата Твоја Македонија. Второ, дадена е позитивна оценка за досегашното функционирање на Владата на Коалицијата со назнака за дополнителен фокус во одредени подрачја од политичките приоритети. Трето, договорен е заеднички настап на следните Локални избори 2025 година, при што споделено е убедување во голема победа“, соопшти Богојески.
Македонски концепт ги доставил своите сугестии за програмските приоритети на Владата за наредната година, за што вели Богојески, јавноста ќе биде навремено информирана.
Именувањето на Богојески за директор на Националната агенција беше проследено со реакции во јавноста, особено поради неговите претходни ставови изразени преку социјалните мрежи.
По ова, Европската комисија рече дека ќе побара објаснување од министерката за образование Весна Јаневска за изборот на директорот на институцијата која раководи со програмите „Еразмус+“ и „Европски солидарен корпус“ во земјава.
Во 2018 кога како „реформатор и фракционер“ Богојески беше разрешен од функцијата заменик-генерален секретар во ВМРО-ДПМНЕ по што ја формираше Македонски концепт.
фотo: Фејсбук профил на Петар Богојески
