Работниците во третата смена во тетовската фабрика „Леар“, ноќеска биле затруени со храната која што им била сервирана во фабричката менза. Според полицијата, случајот е пријавен од медицинскиот персонал којшто интервенирал во тетовската клиничка болница.
„Во утринските часови на нашата клиника поголем број на граѓани побараа здравствена помош. Сите пациенти имале слични симптоми, сите кои побарале, на сите им е пружена здравствена грижа со нашите капацитети, со нашите човечки ресурси. Никој не е препратен на друга клиника и сите се во добра здравствена состојба. На терен излезени се екипи на Центарот за јавно здравје, Агенцијата за храна и санитарна инспекација“, изјави Флорим Бесими, директор на тетовската болница.
Работниците до болницата биле транспортирани со возила на Итна помош.
„Нашите екипи интервенирале веднаш со две возила, повикани се и други резервни екипи. Пациентите имале симптоми на повраќање, болки, малаксаност… Кај голем број пациенти интервенирано е на лице место“, изјави Гзим Нурадини од Итна помош.
Нема официјална бројка колку точно работници биле примени во болница, а според неофицијални информации, сите се пуштени на домашно лекување.
Економскиот експерт, Бранимир Јовановиќ вработен во Институтот за општествени и хуманистички науки на својот Фејбсук-профил посочи на сличен случај во 2015 година, кога работници во компанијата Кромберг&Шуберт од Битола се затруле од храна.
„Компанијата тоа го демантираше, тврдеше дека труењето не е од нивната менза. Државните институции ништо не презедоа. Дали нешто ќе биде поинаку овој пат?“, прашува Јовановиќ.
И компанијата „Леар“ во Тетово и „Кромберг&Шуберт“ се странски компании кои што отворија свои погони во Македонија, првата во ТИРЗ Тетово, а втората во ТИРЗ Битола.
