Државата Белгија е тужена пред судот во Брисел за неисполнување на своите обврски според Конвенцијата на ОН за геноцид, во врска со војната во Газа.
Случајот го покрена организацијата „Droit Pour Gaza/Recht Voor Gaza“ (Правда за Газа), колектив составен од белгиски адвокати, академици и организации на граѓанското општество, како и членови на палестинската дијаспора, јавија белгиските медиуми. Тие тврдат дека Белгија е законски обврзана да дејствува за да спречи геноцид и дека во моментов не го прави тоа.
На 7 јули, групата формално се обрати до премиерот Барт де Вевер, министерот за надворешни работи Максим Преву, министерот за финансии Жан Жамбон и министерот за мобилност Жан-Лик Кроке. Бидејќи немаше официјален одговор, случајот сега се решава по итна постапка од страна на првостепениот суд во Брисел.
Белгија е повикана да преземе итни мерки, вклучително и затворање на воздушниот простор, водните и копнените патишта за испораките на оружје во Израел, забрана за трговија со нелегални израелски населби, замрзнување на средствата на израелските функционери вклучени во војната и поддршка на суспендирањето на Договорот за асоцијација меѓу ЕУ и Израел, кој ги регулира односите за слободна трговија.
„Како и сите страни потписнички на Конвенцијата за геноцид, Белгија има законска обврска да спречува и запира геноцидни акти користејќи ги сите правни средства што ѝ се на располагање“, се вели во соопштението на групата.
Кабинетот на Де Вевер најави „соодветен одговор“, пренесе МИА.
