ЦИВИЛ – Центар за слобода ја објави експанзијата на својата клучна мониторинг-единица за дезинформации и пропаганда, со тоа што ја преименува во ТИМ НА ЦИВИЛ ЗА МОНИТОРИНГ НА ХИБРИДНИ ЗАКАНИ (на англиски: Civil Hybrid Threats Monitoring – CHTM). Одлуката ја одразува стратешката промена на организацијата кон поширок и поинтегриран пристап во справувањето со сложениот спектар на хибридни закани со кои се соочуваат Северна Македонија, Западен Балкан и Европа.
Првично насочен кон мониторинг на дезинформации и пропагандни кампањи, овој тим, сега преименуван на начин што ќе го отсликува проширениот мандат кој вклучува детекција, анализа и разобличување на дезинформации, странски операции на влијание, сајбер манипулации и напади, политичко мешање, говор на омраза и други компоненти на хибридното војување.
„Хибридните закани еволуираат, а тоа ја наметнува потребата и ние да ја следиме таа динамика,“ изјави Џабир Дерала, основач на ЦИВИЛ и главен уредник на медиумската платформа на организацијата. „Овој тим повеќе не е само за следење на лаги во медиумите. Станува збор за одбрана на демократијата во нејзината суштина. Тоа значи директно соочување со софистицираните и често координирани напади врз вистината, мирот и стабилноста.“
Мултидимензионален одговор на растечката закана
Тимот на ЦИВИЛ за мониторинг на хибридни закани ќе работи преку различни платформи, јазици и региони за да идентификува и разобличи шеми на манипулација и операции на влијание. Организацијата потврдува дека обемот на тимот ќе опфаќа широк спектар на хибридни закани – од дезинформации и пропаганда до политичко мешање и говор на омраза, како и комплексни операции на хибридната воена закана. Воедно, ЦИВИЛ објави нема да открива детали за методологијата, ниту пак имињата на членовите на тимот, од очигледни безбедносни и оперативни причини.
„Ова е високо сензитивна работа која се насочува кон актери решени да ја поткопаат демократијата,“ изјави Дерала. „Нашата сила не е само во експертизата и посветеноста, туку и во нашата способност да го заштитиме интегритетот на нашите операции и безбедноста на нашите луѓе.“
ЦИВИЛ е на првите линии во мониторингот на социополитичките процеси и настани, човековите права, застапувањето за медиумската слобода и борбата против дезинформации и хибридни закани повеќе од две децении. Оваа трансформација ја потврдува решеноста на организацијата секогаш да биде чекор пред новите предизвици и да придонесе одлучно во глобалната борба за демократски вредности.
„Војната не секогаш пристигнува со тенкови и ракети,“ додаде Дерала. „Често доаѓа во облик на ботови и тролови, манипулирани наративи, агенти и оперативци кои спроведуваат дигитална пропаганда. Овој тим е тука да го разобличи сето тоа.“
Зајакнати капацитети и меѓународна соработка
Како дел од својата проширена мисија, тимот ќе ја продлабочи соработката со регионални и меѓународни партнери, вклучувајќи го учеството во Глобалната иницијатива за одбрана на демократијата, Вестминстер Алијансата за Украина, и други иницијативи усогласени со ЕУ за спротивставување на авторитарното влијание.
Единицата, исто така, ќе вклучува алатки со вештачка интелигенција, техники за анализа на податоци и механизми за прекугранична размена на информации за подобро следење на хибридните операции и злонамерните актери.
ЦИВИЛ – Центар за слобода
