Хрватски истражувачки новинар поднесе жалба до обвинителите во Милано против српскиот претседател, Александар Вучиќ, за негова наводна вмешаност во аферата „Сараево сафари“, во која снајперисти од Италија и други земји наводно отпатувале во босанската престолнина за да убиваат цивили за време на четиригодишната опсада на градот во 1990-тите, објави Гардијан.
Минатата недела, обвинителите во Милано започнаа истрага насочена кон идентификување на Италијанците наводно вмешани под обвинение за доброволно убиство со суровост и подмолни мотиви.
Според истражителите, групи „снајпер-туристи“ наводно учествувале во масовните убиства откако платиле големи суми пари на војници кои припаѓале на војската на Радован Караџиќ – поранешниот лидер на босанските Срби, кој во 2016 година беше прогласен за виновен за геноцид и други злосторства против човештвото – за да бидат транспортирани до ридовите околу Сараево за да можат да пукаат врз населението од задоволство.
Во среда, истражувачкиот новинар Домагој Маргетиќ поднесе жалба против Вучиќ до обвинителите кои го истражуваат случајот.
Како што објавија во Сараево, во последните денови Маргетиќ објави докази на социјалните мрежи дека Вучиќ, тогашен млад волонтер, бил присутен на еден од воените пунктови во Сараево од кој, според сведоците, странски државјани и српски ултранационалистички единици пукале и убивале цивили во она што е опишано како макабрено „туристичко сафари“, пишува Гардијан.
Николa Бригида, адвокат кој му помогнал на Гавацени да го подготви својот случај, рече: „Доказите собрани по долгата истрага [од страна на Гавацени] се добро поткрепени и би можеле да доведат до сериозна истрага за идентификување на виновниците. Постои и извештај од поранешниот градоначалник на Сараево“.
Повеќе од 10.000 луѓе беа убиени во Сараево од гранатирање и снајперски оган помеѓу 1992 и 1996 година во она што беше најдолгата опсада во модерната историја, откако Босна и Херцеговина прогласи независност од Југославија.
Снајперистите беа можеби најстрашниот елемент од животот под опсада во Сараево, бидејќи неселективно ги убиваа луѓето на улиците, вклучително и децата.
Истрагата произлезе од тужба поднесена од Ецио Гавацени, писател од Милано, кој собра докази за обвинувањата, како и извештај испратен до обвинителите од поранешната градоначалничка на Сараево, Бенџамин Кариќ.
Гавацени рече дека првпат прочитал извештаи за наводните снајперски туристи во италијанскиот печат во 1990-тите, но дури откако го гледал „Сараево Сафари“, документарец од 2022 година на словенечкиот режисер Миран Жупанич, почнал понатаму да истражува.
Гавацени тврдеше дека наводно биле вмешани „многу, многу, многу Италијанци“, без да даде бројка. „Имало Германци, Французи, Англичани… луѓе од сите западни земји кои платиле големи суми пари за да бидат однесени таму за да пукаат во цивили“.
Тој додаде: „Немаше политички или религиозни мотивации. Тие беа богати луѓе кои одеа таму за забава и лично задоволство. Зборуваме за луѓе кои сакаат оружје, а можеби одат на стрелишта или на сафари во Африка.“
Гавацени тврдеше дека осомничените италијански државјани се среќавале во северниот град Трст и патувале до Белград, од каде што војниците на босанските Срби ги придружувале до ридовите на Сараево.
„Имаше сообраќај на воени туристи кои одеа таму за да пукаат во луѓе“, рече тој. „Јас го нарекувам тоа рамнодушност кон злото.“
Вучиќ сè уште не ги коментирал обвинувањата. Сепак, гласините за неговиот престој во Сараево кружат со години.
Во интервју за босански телевизиски канал во 2021 година, српскиот претседател експлицитно негираше дека некогаш пукал врз опколениот град, опишувајќи ги обвинувањата како политичка манипулација вкоренета во националистичката реторика од неговата младост и кревката рамнотежа на моќ во регионот.
