Сенатот на САД на 17 декември одобри закон за трошоци за одбрана од 900 милијарди долари, кој вклучува 800 милиони долари воена помош за Украина, по усвојувањето на законот од страна на Претставничкиот дом минатата недела, пренесува Кијив Индипендент.
Законот беше усвоен од Сенатот со двопартиска поддршка со 77-20 гласови и сега оди кај американскиот претседател Доналд Трамп за потпис.
Со него се предвидува Украина да добива 400 милиони долари годишно за фискалните години 2026 и 2027 година. Финансирањето би се обезбедило преку Иницијативата за безбедносна помош на Украина (USAI), програма водена од Пентагон која финансира договори за оружје со американски одбранбени компании.
Исто така, предлогот бара од Министерството за одбрана да го извести Конгресот во рок од 48 часа од секоја одлука за ограничување на споделувањето разузнавачки информации со Украина, според амбасадорката на Украина во САД, Олха Стефанишина.
Надвор од директното финансирање за Кијив, законот вклучува и одредби што влијаат на воената позиција на САД во Европа.
Законодавството му забранува на Пентагон да го намали бројот на војници „трајно стационирани или распоредени“ во Европа под 76.000 подолго од 45 дена.
Дополнително, се зголемуваат платите за припадниците на вооружените сили, се издвојуваат повеќе средства за воздушниот одбранбен штит „Златна купола“, се зајакнува воената позиција во индо-пацифичкиот регион и се одобрува распоредување на активни трупи на границата меѓу САД и Мексико.
Сумата доделена на Украина од Конгресот претставува само мал дел од вкупната воена помош што САД ја обезбедија од почетокот на целосната инвазија, која изнесуваше 67 милијарди долари до почетокот на мандатот на Трамп.
Претходно, на 16 декември, како што пренесува ЦИВИЛ Медиа, двопартиска група од четири американски сенатори го предложи Законот за намалување на профитот од руска нафта (DROP) од 2025 година, закон со кој ќе се воведат насочени санкции за секој што се занимава со руска нафта.
Д. Мишев
