Скопје и денеска се најде на врвот на негативната европска листа за загаденост на воздухот. Според најновите податоци на платформата IQAir, главниот град на Македонија е втор најзагаден град во Европа, со индекс на квалитет на воздухот (US AQI) од 122, што спаѓа во категоријата нездраво за чувствителни групи, објави Фронтлајн.
Главен загадувач е концентрацијата на ПМ2.5 честички, која утрово изнесува 44,1 микрограми на кубен метар, повеќекратно над препораките на Светската здравствена организација. Овие ситни честички претставуваат сериозен ризик по здравјето, особено за децата, постарите лица, хронично болните и лицата со респираторни и кардиоваскуларни заболувања.
На глобалната листа за најзагадени големи градови, доминираат Делхи и Лахор, со екстремно високи вредности над 300 AQI, но фактот што Скопје е меѓу најзагадените во Европа повторно ја отвора темата за хроничниот проблем со воздухот во земјава.
Метеоролошките услови дополнително ја влошуваат состојбата. Ниските температури, високата влажност и речиси целосното отсуство на ветер создаваат таканаречен „капак“ над градот, што го задржува загадувањето во приземните слоеви на воздухот. Според часовната прогноза на IQAir, се очекува благо намалување на индексот во текот на денот, но вредностите и понатаму остануваат над безбедните граници.
И покрај честите алармантни податоци, граѓаните и понатаму се соочуваат со недостиг од системски и долгорочни решенија. Секоја нова зима повторно ја враќа истата слика – чад, магла и воздух што тешко се дише, додека институционалните мерки остануваат ограничени и краткорочни.
Здравствените власти препорачуваат чувствителните категории да го ограничат престојот на отворено, да се избегнуваат физички активности на загаден воздух и, каде што е можно, да се користат прочистувачи на воздух во затворени простории.
