По повод најавите за пополнување на 18-те испразнети дипломатски позиции во амбасадите, конзулатите и во мисиите на Македонија во странство, и најавите на премиерот Зоран Заев за кохабитација со претседателот Горѓе Иванов, при промовирањето на реформскиот план „3-6-9“ за забрзување на евроатлантските интеграции, лидерот на Синдикатот на македонската дипломатска служба, Сашко Тодоровски, за ЦИВИЛ Медиа изјави дека Македонија има сериозен дипломатски кадар кој може да одговори на предизвикот.
На прашањето како би ја искоментирал неодамнешната изјава на претседателот Иванов дека кај него „ќе поминат само предлозите кои ќе ги исполнат критериумите за професионалност, стручност и искуство“, Тодоровски ни изјави:
„Претседателот Иванов досега не ги покажа овие критериуми во пракса, напротив, се залагаше и потпишуваше за партиски активисти. Меѓутоа, да дозволиме дека можеби променетите околности го промениле и неговиот став. Освен, ако не се работи за погрешна употреба на овие термини за професионалноста. Заради тоа што не значи дека ако некој партиски активист бил три или четири години амбасадор, на тој начин станал и професионалец. Не, тој и понатаму останува репрезент на определени партиски ставови, за разлика од професионалецот кој мора да се грижи за сите партиии и за сите политички опции“.
Во моментов, испразнети се 13 амбасадорски позиции, од кои 12 се во Европа и една во Кина и три конзулски позиции, а Македонија нема амбасадори ниту во Мисијата во ЕУ, ниту во Мисијата на Обединетите нации во Женева, каде има само вршители на должноста. Некои од овие места се испразнети од поодамна, а дел од нив, требаше да се пополнат со кадар од редовите на ДУИ, како дел од коалиција со ВМРО-ДПМНЕ,, но по претседателските избори во 2014 годин, партијата соопшти дека не го признава Иванов за претседател, поради што тој одби да ги потпише акредитивите за амбасадорите.
Ваквиот начин на селектирање на дипломатите и испраќање на служба, по париски клуч, за Тодоровски е неприфатлив.
„Ставот на Синдикатот е многу јасен! Ова веќе не е 1991 или 1992 година. Имаме потполно изградени кадри коишто најпрофесионално се движеле во кариерата, ги поминале сите испити и сите проверки. И оттука – да, можеме во секој момент да покриеме не само 18, туку и повеќе места на шефови на мисии“, вели Тодоровски.
На прославата на Илинден, претседателот Иванов најави дека негов потпис ќе довијат само предлозите за амбасадори, кои ќе ги исполнуваат критериумите за професионалност, стручност и искуство.
„Од сегашните и од идните амбасадори, очекувам засилен ангажман во насока на реализација на поставените стратегиски цели на Република Македонија. А тоа се евроатлантските интеграции, добрососедските односи, регионалната соработка и отвореноста кон сите добронамерни партнери“, истакна Иванов.
Сепак, прашањето на кохабитација на претседателот Иванов (кој во двата мандата, молчаливо ги поддржуваше сите потези на власта на ВМРО-ДПМНЕ) со новата Влада на СДСМ, и покрај оптимизмот на Заев и медиумските најави дека се веќе започнати разговорите со Иванов за пополнување на амбасадорските и на конзулските позиции, останува отворено. Навистина, шефот на македонската дипломатија Никола Димитров најави поместување на балансот кон кариерните дипломати и кон вистинските професионалци, што би претставувало исчекор и разлика во однос на владеењето на ВМРО-ДПМНЕ, за кои е дискутабилно дали е подготвен и Иванов.
Од друга страна, синдикатот на дипломатите во мај, остро реагираше на одлуката на минатото раководство на МНР, кое и во пресрет на формирањето на новата Влада, на 19 мај, по завршување на работното време, ја завршило постапката и донело одлуки за избор на преферирани партиски кандидати за испраќање дипломатско-конзуларни претставништва.
„Уште повеќе, за работа во одредени претставништва избра лица, кои учествувале во крвавите настани во Собранието од 27 април, а кои не само што не смеело да бидат избрани, туку против таквите морало да се поведе дисциплинска постапка, паралелно со постапката за кривично гонење“, стоеше во соопштението на СМДС.
Маја Ивановска
