Одложено е првото рочиште за случајот „Сопот“, откако Специјалното јавно обвинителство (СЈО) го презеде предметот. Следното рочиште Кривичниот суд го закажа за 9 октомври, а причина за одложувањето е службено патување на судијката Дијана Груевска – Илиевска, која го води предметот.
Случајот „Сопот“ е од 2003 години, кога двајца полски војници и еден македонски државјанин загинаа, откако теренско возило на НАТО нагази на мина. Дванаесет лица од селото беа осудени на затвор, заради тероризам, но од прислушуваните материјали објавени во 2015 година беше утврдено дека не постоеле силни докази за пресудата.
Обвинителката на СЈО, Фатиме Фетаи изјави дека очекува судењето да почне што побргу, бидејќи веќе неколку години се одложува, но, не откри со какви аргументи ќе настапи СЈО во постапката.
Во предметот, 10 лица се осудени за кривично дело „Тероризам“.
Обвинителката Фетаи на прес-конференција во мај изјави дека исказот на сведокот Рамадан Бајрами, врз кој како доказ, се изведени сите пресуди во случајот – е изнуден исказ. Фетаи тогаш рече дека МВР и службени лица, врз сведокот извршиле кривично дело тортура. Вештачењето на СЈО покажало дека кај сведокот се утврдени последици по психичкото здравје, но бидејќи не оставиле трајни последици, таквите дејствија се застарени за да бидат гонети, па кривичното дело застарело во 2008 година.
Во еден од прислушуваните разговори, кои ги објави СДСМ, има разговор меѓу поранешната министерка за внатрешни работи Гордана Јанкулоска и тогашниот директор на тајната полиција Сашо Мијалков, за случајот „Сопот“. Според снимката, Јанкулоска му сугерира на Мијалков дека треба да биде консултиран и тогашниот премиер Никола Груевски, за да се види како да се продолжи со овој чувствителен случај, при што и двајцата признаваат дека претходната пресуда со која беа осудени обвинетите, се потпира на „тенки докази“.
За потсетување, експлозијата на мината во Сопот се случи во 2003 година, во време кога Македонија сѐ уште се опоравуваше од вооружениот конфликт од 2001, меѓу албанските бунтовници и македонските безбедносни сили.
По долготрајното судење, 12 обвинети, во март 2010 година, беа осудени на вкупно 150 години затвор, но по забелешките на албанските политички партии, посебна собраниска комисија заклучи дека имало некои пропусти во текот на судењето. Заклучокот на оваа комисија се базираше на тврдењето на сведокот Рамадан Бајрами, кој изјави дека исказот го дал по жестока тортура од полицијата.
По ова, беше донесена одлука за почеток на ново судење, кое што требаше да започне во 2011. Во меѓувреме, еден од обвинетите почина.
