О2 – Коалицијата за чист воздух и Првата детска амбасада „Меѓаши“ во четврток (21 септември) ги повикуваат сите иницијативи, граѓански организации, независни активисти, политички партии и поединци, по повод Светскиот ден на мирот, да излезат на Мировен марш за чист воздух!
„Загадувањето во Македонија се должи на многу причини, од кои главните се противзаконското работење на индустриските погони (без инсталација на соодветни филтри и без придржување до пропишани стандарди), непланското уништување на урбаното зеленило, незаконската и агресивна урбанизација, неспособноста за управување со отпадот, застарените решенија за транспорт, греење… Заеднички именител за сите овие е неспроведувањето на законите во Република Македонија. Токму затоа, особено се надеваме дека маршот искрено ќе го поддржат народните избраници, од кои очекуваме да не го користат за добивање на политички поени“, соопшти О2 – Коалиција за чист воздух.
Протестниот марш ќе почне во 17 часот пред Владата каде ќе бидат изнесени барањата кои 13 организации ги доставија до Министерството за животна средина. Оттаму, активистите ќе тргнат кон Карпош 3, каде ќе дадат поддршка на граѓанските иницијативи „Ние сме Карпош 4“, „Стоп на загадувањето“, „Воздух сега!“ и „Карпош 3“, кои ќе достават свои барања и петиција до Општина Карпош за зачувување на зелениот појас долж реката Вардар којшто, доколку се урбанизира според предвидените незаконски донесени плански документи, ќе значи уште еден тежок удар за и онака прекумерно загаденото Скопје, порачуваат активистите во повикот за Маршот.
Активистите за чиста и здрава животна средина истакнуваат дека постои енормна стапка на загаденост, незапаметен број на заболени лица, како и на смртни случаи кои се директно предизвикани од загадениот воздух во критичните општини во Македонија.
