По повод Меѓународниот ден на толеранцијата, 16 ноември, ЦИВИЛ повикува на прекин на војните и насилството, доследно почитување на меѓународното право, човековите права и слободи, како и на јакнење на меѓусебното разбирање, почитувањето и мирољубивиот дијалог.
Толеранцијата не е ниту попустливост, ниту рамнодушност. Таа подразбира почитување, прифаќање и вреднување на различностите, на културите, идентитетите, убедувањата, начините на изразување и правото на секој човек да живее со достоинство и слобода.
Меѓународниот ден на толеранцијата е прогласен од Генералното собрание на Обединетите нации во 1996 година, по усвојувањето на Декларацијата за принципите на толеранцијата од УНЕСКО во 1995 година. Декларацијата ја утврдува толеранцијата како активен однос заснован врз признавањето на универзалните човекови права и основните слободи.
Во светот и денес продолжуваат војните, вооружените конфликти, насилството и страдањата на цивилното население. Истовремено, во многу општества се продлабочуваат поделбите, нетрпеливоста, дискриминацијата, национализмот и говорот на омраза. Овие појави не се само закана за мирот и безбедноста, туку и директен удар врз демократските вредности и човековото достоинство.
Толеранцијата не смее да биде изговор за молчење пред неправдата, насилството и кршењето на човековите права. Напротив, таа подразбира активна одбрана на еднаквоста, слободата, достоинството и правото на различност.
Во услови на засилени хибридни закани, дезинформации, манипулации, пропаганда и координирани кампањи за ширење страв, омраза и недоверба, толеранцијата е особено важна заштита на демократските општества. Затоа, одбраната на толеранцијата подразбира и критичко размислување, медиумска писменост, препознавање и разобличување на манипулациите, како и одговорно информирање и почитување на слободата на изразување.
По тој повод, ЦИВИЛ ги повикува меѓународните институции и организации да преземат конкретни и одговорни активности за ставање крај на војните и насилството, за доследно спроведување на меѓународното право и за заштита на цивилното население, без двојни стандарди и селективно почитување на меѓународните норми.
ЦИВИЛ ги повикува институциите во Северна Македонија да ги преточат принципите на толеранцијата во конкретни политики и практики, да се спротивстават на дискриминацијата и говорот на омраза и да создаваат услови за еднакво учество на сите граѓанки и граѓани во општествениот живот.
Воедно, ЦИВИЛ повикува на поголема одговорност од политичките чинители, медиумите, образовните институции и граѓанските организации во промовирањето на културата на дијалог, ненасилство, солидарност и меѓусебно разбирање.
Толеранцијата е обврска на поединците, но и на државите и институциите. Таа мора да се практикува секојдневно – во јавниот говор, во институциите, во образованието, во медиумите и во односите меѓу луѓето.
ЦИВИЛ ги повикува сите граѓанки и граѓани да ги почитуваат различностите, да го отфрлат говорот на омраза и дискриминацијата и активно да придонесуваат кон општество во кое слободата, еднаквоста и човековото достоинство се темелни вредности.
Нема толеранција без почитување на човековите права. Нема мир без правда. Нема демократија без еднаквост и почитување на различностите.
ЦИВИЛ ги почитува, застапува и промовира универзалните човекови права и слободи, а со тоа и принципите наведени во Декларацијата за толеранција, од самото основање пред 27 години.
ЦИВИЛ












