„Рече Алаховиот Пратеник, с.а.в.с. ’На секој човек кој ќе се искапе во петок, се исчисти колку што може, и се намириса во својата куќа, потоа тргне во џамија без да вознемирува некого и го клања она што Алах му го пропишал, и молчејќи го сослуша имамот додека зборува, ќе му биде простено она што се наоѓа меѓу тој ден и следниот петок“. (Бухарија)
Денес е петок, ден на џума, два дена пред гласањето на вториот круг од локалните избори во Република Македонија. Очекувам дека во недела, гласачите ќе бидат свежи, свесни за својот избор и последиците од изборот, и полни со позитивна енергија којашто ќе се одрази во заокружувањето на бројот на кандидатот што, според нив, е најдобриот избор за управување со општината во која живеат, а со тоа, и со нивниот живот.
Шпанската серија од коалиции на локално ниво за придобивки на државно ниво, или ако сакате поинаку, новите „неверојатни„ љубовни афери помеѓу довчерашните непријатели, имаат големи шанси да прераснат во најголемото собрание на најчистите и најискрените и најдобронамерните кандидати во изборната историја на Македонија. Навистина, малку ми личат како да ги удрила тешка опортунистичка амнезија (им се извинувам на поупатените што измислив нов термин за амнезија, ми беше потребно за – според мене – точен опис на психичката состојба на кандидатите), така што ќе биде интересно да се следат, откако ќе излезат од таа состојба.
Би било добро денес, сите кандидати, партиски лидери и партиски фаланги, од сите вери и националности, да побрзаат да одат во џамиите најблиски до нив, и заеднички да го извршат светиот петочен обред, за да бидат подготвени за крајот на денот, на големиот – за нив – Бајрам, денот на изборите. Да не биде дека само за Бајрам одат по џамии, за потоа, да ги слави народот за нивната висока свесност за различностите и придобивките од тие различности, во форма на верско препознавање и признавање на другиот. И секако, пред тоа, да се искапат.
А колку ќе им потрае свежината од капењето, ќе зависи од бројноста на собраниот „џемат” и мирисот на нивните души.
Сепак, мислам дека денеска „џамии“ ќе бидат партиските штабови и седишта, во кои ќе се собираат наизменично во текот на денот, сите лично засегнати од исходот на изборите, но не и од нивните избори од нови љубовници. Затоа што го помешале поимот љубов, со пријатели со бенефиции, или во превод „ја те волим, кад ми требаш“, со висока опасност дека на некого, оваа трансакција, од моментална потреба ќе му премине во длабока зависност. Од потреба за понатамошно заедничко капење, и испирање на горчливиот вкус на пост-коалициско освестување и враќање во реалноста.
Во недела е денот на докажувањето на невиноста во колена, на главните протагонисти на овие избори, ден кога ќе се одреди текот на понатамошниот развој на општествено-политичките состојби во земјава. Очекувам дека граѓаните нема да бидат на висина на своите задачи, дадени од партиските братучеди, туку дека ќе бидат со очи свртени кон себе, и на висина на своето достоинство и право на личен и неприкосновен избор. Сериозно.
А сега, трк на џума, и три круга околу џамија!
До недела.