Соња Стаменкова е новата градоначалничка на Македонска Каменица и првата жена градоначалник во Источна Македонија.
Стаменкова, кандидатката на СДСМ, општината ќе ја „наследи“ од кандидатот на ВМРО ДПМНЕ Дарко Митевски, кој по два мандата, не успеа да ја добие довербата од граѓаните и по трет пат. Стаменкова го победи Митевски со 600 гласови повеќе.
Таа е дипломиран психолог и психотерапевт. Има 49 години и работи во приватна здравствена установа. Стаменкова е самохрана мајка.
Покрај Стаменкова, по овие локални избори, Македонија доби уште пет градоначалнички, во општините: Тетово, каде повторно победи досегашната градоначалничка Теута Арифи, Битола – Наташа Петровска, Арачиново – Миликије Халими, Могила – Јасмина Гулевска и Старо Нагоричане – Жаклина Јовановска.
Иако, на Локалните избори 2017, застапеноста на жените на кандидатските листи за градоначалници е зголемена, процентуалната застапеност е сè уште многу ниска.
Од независноста до денес, во сите досегашни влади, само 22 жени биле министерки. Во локалните совети, жените се застапени со околу 30%, резултат кој сепак, повеќе се должи на изборната регулатива со родови квоти за жени.
М. И.
