Специјалното Јавно обвинителство поднесе претставка за утврдување на одговорност на судијката Моника Бахчовановска, судија при Основниот суд Скопје 1 поради нестручно и несовесно вршење на судската функција.
„Судијата Моника Бахчовановска, постапувајќи по поднесен приговор со предлог за издвојување од списите на предметот на незаконски прибавен доказ во предмет за кој ова Јавно обвинителство има поднесено обвинителен акт, на ден 11.09.2017 година донела решение во кое посочила решение на Апелациониот суд Скопје донесено на ден 18.09.2017 година. Тоа упатува дека решението на судијата Бахчовановска е антидатирано решение, или станува збор за друг вид на поведение со кое се врши злоупотребување на положбата и пречекорување на службените овластувања, од аспект на тоа како судијата Бахчовановска можела однапред да ја знае одлуката на Апелациониот суд Скопје“, стои во претставката поднесена до Советот за утврдување на факти и покренување на постапка за утврдување на одговорност за судија.
Иницијативата за разрешување на судијката Моника Бахчовановска, за антидатирање на одлуката со којашто ги отфрла бомбите во случајот „Тифани“ со обвинетата Ивона Талевска, е поднесена на 24 октомври.
Специјалната јавна обвинителка, Катица Јанева во иницијативата за разрешување, објаснува дека Апелациониот суд на 11 септември сѐ уште немал донесено одлука дека ќе важат прислушуваните разговори во обвинението за случајот „Триста“. Но, судијката Бахчовановска, во одлуката баш од 11 септември напишала дека Апелациониот суд одлучил за „Триста“ бомбите да важат, па прашува:„Од каде знаела Бахчовановска на 11.09.2017, каква одлука ќе донесе Апелациониот суд на 18.09.2017?“
Јанева упатува дека решението на судијата Бахчовановска е антидатирано решение, или „станува збор за друг вид на поведение со кое се врши злоупотребување на положбата и пречекорување на службените овластувања, од аспект на тоа како судијата Бахчовановска можела однапред да ја знае одлуката на Апелациониот суд Скопје“.
„Ваквото постапување на судијата Бахчовановска, земено во контекст на постапките кои се водат поради
постоење на основи на сомневање за можни злоупотреби на Автоматизираниот комјутерски систем за управување со судските предмети, сериозно може да навлезе и во делот на кривично-правна одговорност, со што се засилува сериозноста на ваквото постапување на судијата Бахчовановска. Од тие причини барам Советот за утврдување на факти и покренување на постапка за утврдување на одговорност за судија да покрене постапка за утврдување на одговорност за судијата Моника Бахчовановска“, стои во претставката на Јанева.
Судијката Бахчовановска, освен „Тифани“ ги оценува обвинителните акти и за предметите „Титаник“, „Тортура“ и „Тревник“.
М. И.
