ЦИВИЛ со засилено темпо продолжува со своите активности на терен. По јавната презентација на проектот „Слободни медиуми за слободно општество“ во општинската сала во Комитетот во Куманово, ЦИВИЛите посетија уште четири општини.
Овој пат на мапата на тимот на ЦИВИЛ се најдоа Старо Нагоричане, Ранковце, Крива Паланка и Кратово. Преку директна комуникација со граѓанките и граѓаните на овие општини ЦИВИЛ ги запозна со своите активности, а преку њузлетерот им ги приближи медиумските содржини на оние што немаат можност да ги следат онлајн.
Презентирањето на медиумската платформа и проектните активности на ЦИВИЛ не беше единствената цел на тимот кој ги посети овие општини. ЦИВИЛ им даде можност на граѓанките и граѓаните да ги споделат свои мислења и ставови како да се подобри состојбата во медиумите, но и да споделат свои животни искуства и проблеми, да посведочат за локални неправди, вклучувајќи го и влијанието на политичките процеси на локално и национално ниво.
Со овој проект, ЦИВИЛ ќе даде придонес во повеќе комплексни области во тешкиот период на транзиција и демократизација. Со искусен тим, прекален во годините на предизвици, ќе се создаде и артикулира слободен и безбеден простор за динамична размена на информации, ставови и анализи, кои ќе им се понудат на јавноста и институциите. Воедно, проектот ќе даде голем придонес кон политичкиот и општествениот дијалог, јакнење на слободата на изразувањето и медиумската писменост на граѓанките и граѓаните.
М.И.
