„Нема да зборувам од аспект на политичар, туку од аспект на граѓанин. Сум бил во позиција да ми бидат кршени граѓанските права во голем број на случаи, особено изминатите 12-13 години наназад во Република Македонија. Денеска сум во позиција, евентуално и да прекршам некое граѓанско право. Верувајте ми кога ќе се направи анализа границата е многу мала меѓу овие две нешта. Тоа првенствено се базира на менталниот склоп што како индивидуа секој од нас го носи“, изјави градоначалникот на Куманово, Максим Димитриевски на конференцијата на ЦИВИЛ, „Граѓанска повелба – Глобална рамка за учество на граѓаните“.
Градоначалникот на Куманово ја поддржа Граѓанската повелба во делот на целосно исполнување на граѓанските права сметајќи дека локалната власт е многу битна во реализирање токму на овој сегмент, односно давање власт на граѓаните.
Димитриевски, исто така, истакна дека за да се борите за граѓанските права треба да бидете и сами мотивирани да ги побарате.
„Ми се случува како градоначалник да дојде граѓанин и да рече јас го барам тоа и тоа право, но вие побарајте го во мое име. Јас не сакам да се декларирам, нашето општество сѐ уште е заразено и не се чувствувам дека можам да си ги остварам своите права. Тоа е погрешен пристап. Апелирам до сите вас што доаѓаат од владиниот, но првенствено од невладиниот сектор, да ги мотивираме сите граѓани да ги бараат првично сопствените права, бидејќи не може да се бори за нашите права никој друг во наше име доколку иницијативата не тргне од нас“, истакна Димитриевски.
Тој истакна дека, за жал, маргинализираните групи во Македонија, сѐ уште не можат да си ги остварат основните граѓански права, а лицата со попреченост се оставени на маргините на општеството.
„Оваа Граѓанска повелба ќе даде голем придонес за развој на нашето општество, бидејќи ние како држава сме уникатни во многу делови, особено во делот на взаемното разбирање. За жал, искуствата покажуваат дека овие простори многупати биле искористени од поединци кои општите права ги преземале на себе и ја преземале улогата да одлучуваат во име на сите нас, притоа кршејќи ги основните права“, рече Димитриевски.
На крајот од говорот истакна дека локалната самоуправа е тука не само за морална поддршка на невладиниот сектор, туку и за почетна материјална поддршка во спроведување на нивните проекти во интерес и заштита на граѓанските права.
Максим Димитриевски е првиот градоначалник во Македонија, но и многу пошироко, кој го стави својот потпис на меѓународната петиција за поддршка на Граѓанската повелба.
Биљана Јордановска
Камера: Атанас Петровски
Монтажа: Ермин Климента
